Қарадала төсінде дүниеге келіп, қара өлеңнің құдіретін сезініп өскен, жүрек тебіренісін терең де сыршыл сезімнің отына ораған жас ақынның бірі – Мұқағали Нұрсұлтанұлы. Бүгінде Ұйғыр ауданындағы И. Искандеров атындағы орта мектептің 11-сыныбында білім алып жүрген ол талай жыр додасында топ жарып, үздіктер қатарынан көрініп жүр. Поэзия әлеміне жүрекжарды жырымен, ерекше болмысымен еніп келе жатқан жас таланттың лирикалық өлеңін оқырман назарына ұсынамыз.
АППАҚ АРМАН
Жапырақ дір-дір етті,
Тағы да сені ойладым.
Бір жұлдыз сырғып өтті,
Тағы да сені ойладым.
Қараша ызғарлы еді,
Жан дүнием теңселетін.
Аңқиды гүлзар демі,
Әтірден сен себетін.
Жүректен үздім де жыр,
Мен сені есіме алдым.
Кейпіндей күздің қоңыр,
Жанарға көшіп алдың.
Күлкіңмен күміс ырғақ,
Жанымды өртеген ең.
Сен үшін тынысымды ап,
Кешемін ертегі әлем.
Жазылып маңдайға бақ,
Жолыма төгілген нұр.
Бұл өмір сондай ғажап,
Көзіңдей сенің мөлдір.
Тулаған теңіз күшін,
Толқытып көкіректе,
Сәттердің ең ізгісін,
Кешсек қой осы ретте.
Көрмеген, тілдеспеген,
Келдің бе, жат ғаламнан?
Ойымнан мүлде өшпеген –
Ол сенсің, аппақ арман!
Мұқағали НҰРСҰЛТАНҰЛЫ,
И.Искандеров атындағы орта мектептің 11-сынып оқушысы
Ұйғыр ауданы
