Қазақстан халқы Ассамблеясының 30 жылдық мерейтойына арналған республикалық телекөпірдің қорытынды отырысы өтті. Елдің барлық өңірін ортақ эфирде тоғыстырған бұл кең ауқымды трансляция мерейтойлық жылдың ең ірі жобалары мен тың бастамаларын бір арнаға тоғыстырып, жаңа форматта кең көрініс тапты. Облыстық әкімдіктің мәжіліс залына жиналған ҚХА облыстық филиалының мүшелері де бейнебайланыс арқылы телекөпірге қатысып, бейнекөріністерді, өңірлік презентацияларды тамашалады.
Телекөпірге қатысушылар отбасы құндылықтарын қолдау, жастар бастамаларын дамыту, этностар мәдениеті мен тілдерін ілгерілету, қайырымдылық жобалар, еңбек ұжымдарындағы жұмысты жандандыру, этномедиацияны дамыту және жаңа қоғамдық кеңістіктер ашу бағыттары бойынша атқарылған нәтижелерді таныстырды.
Тікелей эфир барысында өңірлердегі ҚХА құрылымдарының жұмысына арналған деректі роликтер көрсетілді. Онда балаларға арналған жобалар, дәстүрді дәріптеу бағдарламалары, студенттерді қолдау шаралары, ұлттық ойындар кабинеттерінің ашылуы, шығармашылық және коворкинг алаңдарының жұмысы, әлеуметтік орталықтардың қызметі түсірілген фильмдер мен жарық көрген кітаптар туралы ақпарат айтылды. Тікелей қосылымдар бастамалардың өңірлерде қалай жүзеге асып жатқанын нақты уақыт режимінде көрсетуге мүмкіндік берді.
Жастар бағыты телемостың ең әсерлі бөлігінің бірі болды. Көрермендер жас көшбасшыларды даярлау мектептерінің жұмысы, халықаралық лагерь жобалары, шығармашылық ұжымдар қызметі және Достық үйінің бірінде ашылған тәулік бойы жұмыс істейтін жаңа комьюнити-орталықтың мүмкіндіктерімен танысты. Бұл бастамалар жастардың қоғамдық идеяларды жүзеге асыруына арналған заманауи орта қалыптасып жатқанын айқын көрсетті. Телекөпірде қайырымдылыққа арналған жайттар да маңызды мазмұнмен толықты. Көпбалалы және аз қамтылған отбасыларға көмек, әлеуметтік мекемелерді қолдау, инклюзивті орта қалыптастыруға бағытталған жобалар таныстырылды. Сонымен қатар, өңірлер жастармен жұмыстың жаңа әдістерін, спорттық шаралардың ұйымдастырылуын және волонтерлік бастамаларды қолдау мысалдарын көрсетті.
Қорытынды бөлімде қатысушылар алдағы міндеттер туралы ой бөлісті. Облыстық Қазақстан халқы Ассамблеясы төрағасының орынбасары Гамзе Гейдаров:
Жаңа жылдан бастап жұмыс тәсілдерін қайта қарап, жобаларды заманауи әрі алуан форматта жасауды жоспарлап отырмыз. Кеңес мүшелері бұл ұсыныстарды қолдады, қазірдің өзінде жаңа бағыттар әзірленуде, – деп айтып өтті.
Келесі кезекте сөз алған белгілі қоғам қайраткері Асылы Осман мемлекеттік тілді дамытуда жастардың рөлін ерекше атап өтті. Ол өз сөзінде:
Ассамблея мемлекеттік тілдің дамуына зор үлес қосты. Бірақ бұл жеткіліксіз. Оны ілгерілететін де, нығайтатын да – жастар. Өйткені елдің болашағын айқындайтын да солар, – деп келешек кемел білімді, көшбасшы жастармен көркейетінін тілге тиек етті.
Телекөпір мерейтойлық жылды қорытындылап қана қоймай, алдағы бағыттарды талқылаудың алаңына айналды. Жиында жұмыс әдістерін жаңарту, жастармен өзара байланысты күшейту, білім беру және мәдени жобаларды кеңейту жөнінде ұсыныстар айтылды.
Құралбек СӘБИТОВ
