Қарасай ауданында облыстық жастар ресурстық орталығының ұйымдастыруымен жастардың шығармашылық әлеуетін арттыруға бағытталған «JAS STARS» өнер байқауы өтті. Шараның басты мақсаты өнерге бейім дарынды жастарды қолдау, олардың қабілеттерін дамыту және командалық бірлікті нығайту болды.
Өнер сайысы екі кезеңнен тұрды. Алдымен аудандарда өзара жарысқа түсіп, үздік шыққан жеңімпаздар финалға жолдама алған болатын. Қатысушылар үш бағыт – вокал, би және музыкалық аспапта ойнау бойынша өз өнерлерін ортаға салды. Иә, бұл жолы да олар қаншалықты дарынды екенін көрсетті. Байқау барысында үміткерлер таланттарын танытып қана қоймай, тәжірибе алмасып, жаңа достар тапты.
Облыстық жастар ресурстық орталығының бөлім басшысы Шыңғыс Мұқашевтың айтуынша, аталған шара жастардың өнерге деген ынтасын арттыруға және шығармашылыққа шабыт беруге бағытталған.
– Алматы облысының әр өңірінен келген 11 команда өзара бақ сынады. Өз өңірлерінде дараланған жастардың шешуші жарысқа ерекше дайындықпен келгені байқалды. Сахнаға шынайы таланттар жолдама алып, алдағы уақытта еліміздің намысын қорғайтын дарындар іріктеліп келе жатқанын аңғарғандай болдық. Қатысушылардың барлығына өнерде де, өмірде де табыс тілеймін. Еліміздің айбынын асқақтата берсін, – деді ол.
Тартысты өткен өнер сайысында бірінші орынға Қарасай ауданының өнерпаздары лайық деп танылып, 350 000 теңге көлеміндегі сыйлықты иеленді. Ал екінші орын мен 250 000 теңгелік жүлде Қонаев қаласындағы «Өнер» мектебінің еншісіне бұйырды. Жеңімпаздардың алғашқы үштігін Балқаш ауданынан келген жастар түйіндеп, арнайы диплом мен 150 000 теңге қаржылай сыйлықты қанжығаларына байлады.
Кеш соңында танымал эстрада жұлдыздары мен арнайы шақырылған музыкалық топ әуелете ән салып, көрерменге көтеріңкі көңіл-күй сыйлады. Бір айта кетерлігі, «JAS STARS» өнер байқауы жастардың шығармашылық әлеуетін қолдауға бағытталған дәстүрлі жобаға айналмақ.
Қуат Қайранбаев
Қарасай ауданы
