Қонаев қалалық Мәдениет үйінде «Ауылым – алтын бесігім» атты аудан-қалалардың Мәдениет күндері қорытындыланды. Байқаудың салтанатты гала-концертінде облыс әкімінің орынбасары Ғани Майлыбаев 9 аудан мен 2 қаланың үздік мәдениет қызметкерлерін марапаттады.
Облыс әкімдігінің қолдауымен, мәдениет, архивтер және құжаттама басқармасына қарасты халық шығармашылығы орталығының ұйытқы болуымен өткен мәдени кештің шымылдығы салтанатты интромен түрілген соң, облыс әкімінің орынбасары Ғани Майлыбаев мәдениет саласының қызметкерлеріне ізгі тілегін арнады.
– Өнер – халқымыздың баға жетпес қазынасы. Еліміздің рухани дамуы мен кемелденуі мәдениет саласының ілгерілеуімен тікелей байланысты. Осы орайда облыс мәдениетінің өркендеуіне үлес қосып жүрген өнерпаздарға шынайы алғысымызды білдіреміз. Ұлттық құндылықтарымызды ұлықтап, туған өлкемізден шыққан тұлғаларды насихаттау мақсатында жыл сайын мәдениет саласында көптеген іс-шара өткізіліп келеді. Осы тұрғыда 2025 жылдың да табысты болғанын атап өткен жөн, – деген Ғани Айдарұлы биыл өңірде тойланған ұлттың рухани алыптары күйші, композитор-дирижер Нұрғиса Тілендиевтің 100 жылдығы, халық ақыны Тұманбай Молдағалиев пен Еркін Ібітановтың 90 жылдықтары, айтыскер ақын Оразалы Досбосыновтың 50 жылдық мерейтойы сынды ауқымды шаралардың барлығында мәдениет қызметкерлерінің өлшеусіз еңбегі бар екенін ерекше атап өтті. Тіпті кейбірінің ЮНЕСКО деңгейінде атап өтілгені – өңірдің мәдениет саласының биік дәрежесін айқындайтынын айтты.
– Бұл шаралардың барлығында сіздердің ерен еңбектеріңіз бен қажырлы жұмыстарыңыз айқын көрініп, жоғары бағасын алды. Бүгінгі облысымыздың мәдени келбеті – сала көшін өрге сүйреп келе жатқан сіздер секілді кәсіби мамандар еңбегінің жемісі екені сөзсіз, – дей келе жүзден жүйрік шыққан мәдениет өкілдеріне лайықты құрмет көрсетіп, өңір руханиятына сүбелі үлес қосқан өнер иелеріне облыс әкімінің Алғыс хаты мен ақшалай сертификаттарды табыс етті.
Облыстық байқаудың нәтижесі бойынша алдымен арнайы номинация иелері марапатталды. «Үздік музей көрмесі» номинациясын Еңбекшіқазақ ауданының Шелек тарихи-өлкетану музейі иеленіп, мәдени мұраны сақтау жолындағы ізденістерінің жемісін көрді. «Үздік кітап көрмесі» атағы Қарасай ауданының еншісіне бұйырса, өңірдің көркемдік тынысын айшықтаған «Үздік көрме» номинациясын Райымбек ауданы жеңіп алды. Ұлттық өнердің саф үлгісін сақтап келген «7 қазына» құсбегілер мұражайы «Үздік құсбегілік өнер» номинациясының жүлдегері атанды. Жеңімпаздардың барлығына 200000 теңгелік сертификат табысталып, құрмет көрсетілді. Жас таланттарды қолдау мақсатында тағайындалған «Жаңа есім» номинациясы Алатау қаласының өнерпазы Бағжан Ерғайыпқа бұйырса, «Үздік қолөнер шебері» атағын Талғар ауданынан келген Гүлнар Өнерхан еншіледі. Сондай-ақ Қарасай ауданының өрені, республикалық турнир чемпионы Аяжан Бердімұрат «Үздік ұлттық ойын» номинациясының жеңімпазы атанса, қазақ дәстүрін қайта жаңғырту бағытындағы еңбегі үшін Жамбыл ауданы «Ұлттық көне дәм» номинациясын ұтып алды.
Бұл бағыттағы жүлдегерлерге 100 мың теңгелік сертификат табысталып, еңбектері елене түсті. Алатау қаласы, Талғар, Еңбекшіқазақ, Қарасай және Райымбек аудандарының мәдениет ұжымдары да құрметтен қалыс қалмай, байқауға белсенді қатысып, ұлттық өнерді кеңінен дәріптегені үшін 400 000 теңгелік сертификат пен Алғыс хат иеленді.
Ауылдың рухын көтеретін айрықша сайыстың нәтижесі бойынша жүлделі 3-орын Жамбыл ауданы мен Кеген ауданының мәдениет ұжымына бұйырып, әрқайсысы 500 000 теңгелік сертификатпен марапатталды. Ал Қонаев қаласы мен Ұйғыр ауданының өнерпаздары 2-орын иленіп, 800 000 теңгелік сертификатқа қол жеткізді. Байқау талаптарына сай биік меже көрсетіп, 1-орыннан көрінген Балқаш ауданының Мәдениет үйінің ұжымына 1 500 000 теңге табысталды. Кештің ең салтанатты сәті Бас жүлде иегерін анықтау болды. Бұл марапатқа Іле ауданының мәдениет өкілдері лайық деп танылды. Оларға арнайы Алғыс хат пен байқаудың ең құнды сыйлығы «JAC S3 PRO» автокөлігінің кілті табысталды.
Жүлдегерлер сахнадан көл-көсір қуанышпен тарқап, өнер мен руханиятқа деген құрметтің шексіз екеніне тағы бір мәрте көз жеткізді. Бұл марапаттар тек ұжымдардың ғана емес, тұтас өңірдің рухани жеңісі, мәдениетке деген қамқорлықтың көрінісі екені сөзсіз.
Марапаттау рәсімінен кейін Қонаев аспанында ән қалықтап, күй шалқыды. Дәстүрлі өнердің сан түрлі бояуын алып келген өнерпаздар көрерменді бірде тербетіп, бірде шаттыққа бөледі. Әр ауданнан сахнаға шыққан өнер сайыпқырандары қазақ руханиятының кең тынысын айшықтады. Бұл күнгі қуанышты сәттің ортасынан табылған елімізге белгілі әнші Жұбаныш Жексенұлы да өнерімен көпшілікті тәнті етті.
Құралбек СӘБИТОВ
