Төтенше жағдайлар министрі Юрий Ильин Алматы облысының Талғар ауданында жүрген көшкінге қатысты түсінік берді. Министрдің айтуынша, көшкін болған аймақта үй салуға кім рұқсат бергенін тексеру керек. Ол бұған жергілікті атқарушы органдар мен тұрғындардың өзі жауапты болуы тиіс деп санайды.
27 ақпан күні Талғар ауданының Бесағаш ауылына қарасты Бурабай коттедж қалашығында топырақ көшкені хабарланған. Көшкіннен тұрғындар зардап шекпегенімен, бірнеше үй бүлініп, зақымданған.
«Жерді бөлуге төтенше жағдайлар министрлігі ғана емес, оған рұқсат берген жергілікті атқарушы органдар да жауап береді. Әрине, тұрғындардың өзі жауапты. Ол жерде бөктердің тегістелгені көрініп тұр ғой» деді министр.
Оның сөзінше, арнайы комиссия оқиғаның себебін анықтаған соң іс ары қарай құқық қорғау органдарына жер телімдерін кім бергенін тергеу үшін жолданады.
