Әкім: Алматыда 2025 жылға қарай дизельді автобустар жүрмейді

Алматы әкімі Ерболат Досаев қала экологиясын жақсарту үшін «жасыл дәліз» концепциясы іске асырылатынын мәлім етті.
ҚазАқпарат агенттігінің хабарлауынша, әкім Досаев бұл туралы бүгін Жетісу ауданының тұрғындарымен кездесуінде айтты.
«Кеше президент «жасыл дәліз» құру: қалада өзендер мен көшелердің бойын көгалдандыру, экологиялық таза көлік құралдарына өту туралы ұсынымызды қолдады. Мемлекет басшысы 2025 жылға дейін бізде дизель отынымен жүретін бірде бір автобус болмасын деген. Қазір мәселенің оңтайлы шешімін табу үшін институттар мен ғалымдарды тартып жатырмыз. Бастысы, тиімді экологиялық транспорт болса және қыс кезінде көмір және басқа да қатты отын жақпайтын болсақ, қаладағы экологиялық ахуал меніңше, алдағы үш жылда жақсарады», – деді Досаев.
Әкімнің сөзінше, қалада «жасыл дәліз» құру жоспары Дүниежүзілік банкпен бірлесіп дайындалып жатыр. Оның аясында көпшілікке қолжетімді көгалды аймақтар құру, көгалды аумақтар ауқымын ұлғайту, оның ішінде Алматы агломерациясына кіретін өзендер мен каналдар бойын көгалдандыру жоспарланып отыр.