Прокурордың айтуынша, Алматы облысы аумағында облыстың бас жоспарына сай келмейтін нысандар көптеп салынып жатыр.
«Алматы облысында нысандар түрлі деңгейде маңызы бар жолдарға, әлеуметтік объектілерге және тағы басқаларына жүктемені есепке алмай бой көтеріп жатыр. Біздің міндетіміз – ғимараттардың жоспарға сай емес салынуының себебін анықтау және оларды жою шараларын қабылдау. Ол үшін өңірде «Заң бойынша жер» жобасы іске қосылмақ», – деді Азамат Күреңкей.
Прокурордың сөзінше, жоба екі бағыттаіске асырылады. Алғашқысы, жерге неліктен заңсыз ғимараттар салынып жатқаны анықталады. Оның ішінде, жергілікті атқарушы органдардың заң бұзушылығы мен олардың бақылаусыз салынған нысандарға қатысы бар-жоғына талдау жүргізіледі.
Екінші бағыт бойынша жерді заңға қайшы жолмен пайдалану жөніндегі іс-қимылдарға ықпал ететін не заңдастыратын нормативтік және заңнамалық актілер қарастырылады. Оның ішінде, Алматы төңірегіндегі елді мекендерде нысандарды бақылаусыз салуға жағдай жасайтын нормалар анықталады.
Азамат Күреңкей жобаны іске асу барысы және нәтижелері туралы мәліметтер БАҚ арқылы мәлім етілетінін айтады.
Alatau News
