Қонаев қаласында бүгін облыстық мемлекеттік кірістер департаментінде салық төлеушілер қауымдастығының конференциясы өтті. Шарада салық тақырыбы тереңнен талқыланып, заң аясындағы өзгерістер жайы тарқатылды.
Конференцияға қаржы вице-министрі Ержан Біржанов, облыс әкімі Марат Сұлтанғазиев, Жоғарғы соттың мүшелері, мемлекеттік кірістер комитетінің басшылары, облыстық мемлекеттік кірістер департаментінің өкілдері, облыстық сот судьялары, мемлекеттік органдар мен салық төлеушілер қатысты.
Жиында облыс әкімі Марат Сұлтанғазиев өңір экономикасының дамуын баяндап, мәліметтер келтірді. Өткен жылы мемлекеттік бюджетке түсім 780 млрд. теңгені құраса, жергілікті бюджет қоржыны 396 млрд. теңгеге толыққан. Бұл көрсеткіш өңір өркендеуінің оң бағытта екенін аңғартады. Алматы облысы соя, жүгері, көкөніс, картоп, ет, жұмыртқа және жүн өндіру бойынша ішкі нарықта жетекші орын алады. Аймақ басшысы жалпы өңірлік өнімнің 3,5 пайызға өсуін қамтамасыз етуді тілге тиек етіп, биылғы жылы да тұрақты экономикалық өсімді сақтау жоспарын жеткізді.
“Облыс тұрғындарына қолайлы жағдай жасау және инвесторлар үшін инвестициялық тартымдылықты арттыру мақсатында облыста шетелдік және жергілікті инвесторларды тарта отырып газдандыру, сумен қамтамасыз ету және суару жүйелерін кеңейту жұмыстары жүргізіліп жатыр”, – деген әкім, баса назар аудару қажет бірқатар мәселеге тоқталды.
Марат Сұлтанғазиевтің сөзінше, салық заңнамасының нормаларын қаржы органдарының, салық төлеушілердің және сот органдарының бірдей қолданғаны маңызды. Атап айтқанда, өнім экспорттаушы кәсіпорындарға қосымша құн салығын (ҚҚС) қайтару маңызды. “Мысалы, “Маревен фуд” компаниясы экспорттаушыларға қосымша құн салығынан асып кеткен 5,7 млрд теңгені қайтаруы керек”, – деді облыс әкімі.
Осы орайда Марат Елеусізұлы жерді пайдаланудың тиімділігін арттыратын салық салу режимін әзірлеуді ұсынды. Оның сөзінше, бұл режим облыс экономикасын дамытуға оң ықпал етеді.
“Қазіргі таңда облыста ауылшаруашылығы жерлерінің белгіленген мақсатта пайдаланылмай немесе мүлдем пайдаланылмай отырғаны туралы деректер бар. Мұндай заң бұзғандарға 20 еселенген салық салынады”, – деді Марат Сұлтанғазиев.
Сөз соңында облыс орталығы Қонаев қаласының келешектегі даму жоспары, арнайы бейнеролик көрсетілді.
Қонаев қаласы,
Құралбек Сәбитов
