Бүгін Қарасай ауданаралық көпсалалы ауруханасында 22 ақпан күні дүниеге келген үшемдер үйіне шықты. Бұл туралы Алматы облыстық денсаулық сақтау басқармасы хабарлады. Аталған перзентханада екі ұл бір қызды өмірге әкелген 29 жастағы Ақмарал Айдар көпбалалы ана атанды. Үшемдердің үлкені Қаракөз 2460 гр, Садық 2100гр, Сыдық 1820 гр салмақпен туған.
Қарасай ауданаралық көпсалалы ауруханасы директорының ана мен баланы қорғау жөніндегі орынбасары Индира Кабаеваның айтуынша, үшемнің анасы жүктілік кезінде қатаң бақылауда болды.
– Үшемдерді анасы жүктіліктің 36 аптасында босанды. Жалпы үшемдерді бірден босану ана мен бала денсаулығы үшін қауіпті. Сондықтан қатаң бақылауда ұстадық. Балалар кесарь тілігі арқылы дүниеге келді. Қазір үшемдердің де, анасының да жағдайы бірқалыпты, – деді Индира Кабаева.
Көпбалалы ана атанған Ақмарал Айдар дәрігерлерге алғысын білдірді.
– Аурухана қызметкерлеріне алғысымды білдіремін. Дәрігерлердің біліктілігінің арқасында үшемдерді аман-есен босандым. Біз үшін үшемдердің өмірге келуі үлкен қуаныш, – деді Ақмарал Айдар.
Сонымен қатар Индира Кабаева үшемдерге тиісті медициналық көмек көрсетілетінін де айтты.
– Қарасай ауданында 2023 жылы өмірге келген алғашқы үшемдердің күтіміне тұрғылықты жерінде орта медицина қызметкерлері көмек көрсетеді. Учаскелік дәрігер балалардың денсаулығын бақылауда ұстайды, балаларға арналған тамақпен қамтамасыз етеміз, – деді ол.
Ақмарал Айдар үшемдерден өзге үш баланың анасы. Балалардың үлкені 8 жаста.
Айта кетейік, Қарасай ауданында былтыр 2 үшем дүниеге келген болатын.
