Қонаев қаласындағы №949 сайлау учаскесіне Қонаев қаласының символына айналған «барыс» келді. Нақтырақ айтар болсақ, облыс орталығының бас белгісіне айналған барыс киімін киген қала тұрғыны Нұрбек Орманов сайлау учаскесінде өз таңдауын жасады. Нұрбек Жүзбайұлы жаңа мәртебеге ие болып, көркеюдің кемел жолына бастаған Қонаевтың символы барыс киімін кию себебін түсіндіріп, бұл сайлаудың маңыздылығына тоқтап өтті.
– Егеменді елдің ертеңі жастардың қолында, біз жастар ұшқыр ойлы, жасындай жарқылдап тиянақты еңбек етсек, Отанымыздың болашағы биікте болмақ. Барыс киімін киген себебім бүгінгі сайлауға өзгеше ажар бергім келді және Қонаев қаласына деген биік құрметімді символы арқылы суреттеуді қаладым. Бірақ бүгінгі әр азамат өз таңдауын жасаған айрықша сәтте бұл маңызды емес, мәндісі дауыс беру алаңынан ешбір тұрғынның қалыс қалмауы, өз таңдауы арқылы бедерлі болашаққа жол жалғауы болмақ, – деді «барысқа» айналған Нұрбек Омаров.
Бүгін елімізде Қазақстан Парламенті Мәжілісі мен мәслихаттар депутаттарын кезектен тыс сайлау өтіп жатыр. Алматы облысында сайлаушыларға арнап 629 сайлау учаскесі ашылған.
Құралбек СӘБИТОВ
