Қазақстан Үкіметінің қаулысымен Алматы облысында «G4 City» арнайы экономикалық аймағы (АЭА) құрылды. Ауданы 30 мың гектар құрайтын аймақ 2048 жылға дейінгі кезеңге жоспарланған.
Қаулыға сәйкес, экономикалық аймақ Алматы қаласының солтүстігінде, ұзындығы 80 шақырым А3 тас жолының (Алматы – Қонаев) бойын қамтиды. Оның аумағында арнайы құқықтық режим орнайды.
G4 City даму тұжырымдамасына сәйкес интеграцияланған қала 4 ауданнан тұрады:
– Gate City – іскерлік және қаржылық орталық;
– Golden District – білім беру және медициналық хабы;
– Growing District – инновациялық-индустриялық және сауда-логистикалық аймақ;
– Green District – туристік кластер.
G4 City-де шамамен 2,2 млн адам тұрады деп болжануда.
Жаңа экономикалық аймақ G4 City интеграцияланған қаласын құруға отандық және шетелдік инвестицияны тарту үшін қолайлы жағдай жасайды деп күтіліп отыр. Бұл өз кезегінде бүкіл аймақтың дамуына жаңа серпін береді.
Атап айтқанда, 2048 жылға дейін АЭА шеңберінде шамамен 3,7 трлн теңге көлемінде инвестиция тарту, құны 17 трлн теңгеден астам қызметтер мен тауарлар өндіру, 60 мыңға жуық жұмыс орнын құру жоспарланып отыр.
