Алматы облысының прокуратурасы Шамалған, Жандосов, Шалқар, Еңбекші, Үштерек, Құмарал, МТФ Тұрар ауылдары мен Арай, Аянат, Дархан, Баркөл бау-бақша қоғамдары тұрғындарына газ бағасы арзандағанын хабарлады.
Прокуратураның мәліметінше, жыл басынан бері аталған елді мекендердің тұрғындары өздері тұтынатын газ бағасы қымбат екенін айтып шағымданған. Осыдан кейін аудан прокуратурасы тариф белгілеуге қатысты талдау жүргізген. Аталған елді мекендерге «Сигма-ГАЗ» ЖШС қызмет көрсетеді.
Тексеру нәтижесінде Алматы облыстық табиғи монополияларды реттеу департаментінің монополияға қарсы заңды бұзғаны анықталған. Атап айтқанда, департамент облыс прокуратурасының 2021 жылы 12 қарашада шығарған департамент басшысының табиғи ғаздың 1 текше метрі үшін 37,5 теңге тариф қою және тарифтің ұлғаюы фактісі бойынша бағаға сараптама жүргізу туралы қадағалау актісін бұзған.
Қадағалау актісін қарастырған соң облыстық табиғи монополияларды реттеу департаменті 10 наурызда «Сигма-ГАЗ» ЖШС тарифін бекіткен. Енді 1 сәуірден бастап жоғарыда аталған елді мекендердің тұрғындары 1 текше метр газ үшін қосымша құн салығын қоса есептегенде 28,95 теңге төлейді.
Прокуратура мәліметінше, газ бағасы төмендетілген ауылдар мен бау-бақша қоғамдарында 10 мыңға жуық тұтынушы бар.
Газ таратумен айналысатын «Сигма-ГАЗ» фирмасы әкімшілік жауапқа тартылып, 2 миллион теңгеден астам айыппұл салынған.
