Алматы облысының әкімі Марат Сұлтанғазиев бүгін қоғамның әр саласында қызмет атқарып жүрген және көп бала тәрбиелеп отырған әйелдерді 8 наурыз мерекесімен құттықтап, жылы лебізін арнады.
– «Әйелдердің қоғамдағы рөлін кеңейте түсу – мемлекетіміздің алдында тұрған негізгі міндеттің бірі» деп президент Қасым-Жомарт Тоқаев айтқандай, нәзік жандарға қолдау көрсету, қамқорлық таныту ісі қашанда жалғасын таба береді. Өскелең ұрпаққа өнегелі тәлім-тәрбие беру ісінде әйелдер айрықша рөл атқарады. Сондай-ақ, экономикадағы, саясат пен қоғамдық қызметтегі үлес салмағы мен рөлі жыл өткен сайын артып келеді. Бір сөзбен айтқанда, аналардың еңбегі барлық құрметке лайық. Баршаңызды көктемнің шуақты мерекесі – Халықаралық әйелдер күнімен шын жүректен құттықтаймын! – деді облыс әкімі.
Елімізде қыз-келіншектер білім беру мен денсаулық сақтау, мәдениет пен спорт, құқық қорғау органдары мен мемлекеттік қызметте және басқа да салаларда табысты еңбек етіп жүр.
Өңір басшысының сөзіне сүйенсек, Алматы облысында мемлекеттік органдар мен ірі компанияларда басшылық қызмет атқаратын немесе бизнес саласында кәсібін өркендетіп жүрген әйелдер аз емес. Мәселен, мемлекеттік қызметте еңбек ететін қыз-келіншектердің үлесі – 53 пайыз, сондай-ақ, денсаулық сақтау саласында 68, білім беру саласында 71 және мәдениет саласында 47 пайызды құрайды. Олар аймақтың өсіп-өркендеуі мен тұрақты дамуы жолында өз қолтаңбаларын қалдырып келеді.
Қызметте үздік нәтиже көрсеткен арулар қауымы, ошағының отын өшірмей, ұрпақ тәрбиесіне де баса мән беріп, елдің демографиялық өсіміне үлес қосып жүр.
Айтулы шарада аймақ басшысы көп бала тәрбиелеп отырған ақ жаулықты аналарға ерекше алғысын білдіріп, «Алтын» және «Күміс» алқаны табыстады.
Мерекелік басқосуда арулар қауымы ерекше көңіл-күй сыйлаған облыс басшысына алғысын білдіріп, алдағы уақытта ел игілігі жолындағы істерін жалғастыратынын айтты.
Шараның соңы шағын мерекелік концертке ұласты.
