Қазақстанда өтетін парламент мәжілісі мен мәслихат депутаттарын сайлауға Еуропадағы қауіпсіздік және ынтымақтастық ұйымынан (ЕҚЫҰ) 400-ге тарта бақылаушы келеді. Ресми БАҚ-тың хабарлауынша,бұл туралы Орталық коммуникация қызметінде өткен брифингте Қазақстан сыртқы істер министрінің орынбасары Роман Василенко мәлім етті.
«Қазақстанда өтетін сайлауды бақылауға ЕҚЫҰ-дан 400-ге жуық бақылаушы келеді. Бұл ең ірі халықаралық бақылаушылар миссиясы болайын деп тұр. Өткен аптада ЕҚЫҰ миссиясының аралық есебі жарияланды, онда халықаралық сарапшылар Қазақстандағы сайлау жүйесіне жасалған реформаны оң бағалады», – деді Роман Василенко.
Министр орынбасарының сөзінше, ЕҚЫҰ жіберетін бақылаушылар қатарында жоғары лауазымды шенеуніктер де бар.
Василенко Қазақстандағы сайлауға ЕҚЫҰ-ның назар аударуы елдегі ауқымды реформаларға халықаралық қауымдастықтың мүдделі екенін және қолдайтынын айғақтайды дейді.
Елімізде парламент мәжілісі мен мәслихат депутаттарын кезектен тыс сайлау 19 наурызда өтеді. Сайлау науқанына 7 саяси партия қатысып жатыр.
