Қазақстанда мұғалімдер күні енді 5 қазанда атап өтіледі деп хабарлады премьер-министрдің баспасөз қызметі. Қазақстан үкіметі қабылдаған қаулыға сәйкес, бұған дейін қазан айының алғашқы жексенбісінде атап өтіліп келген мұғалімдер күні енді Дүниежүзілік мұғалімдер күнімен сәйкестендіріліп, 5 қазанда мерекеленеді. Дүниежүзілік мұғалімдер күнін әлемнің 100-ден астам елі атап өтеді.
Мұғалімдер күні – білім беру саласындағы қызметкерлердің барлығына ортақ кәсіби мереке. Бұл күні ұстаздар қауымының қоғам дамуындағы рөлі мен еңбегі, оған қосатын зор үлесі аталып өтіледі.
Оқу-ағарту министрлігінің мәліметінше, бүгінде Қазақстанда мектепке дейінгі, орта, техникалық және кәсіптік білім беру ұйымдарында 556 мың педагог еңбек етеді.
Дүниежүзілік мұғалімдер күнінің құрылуына 1966 жылы 5 қазанда Парижде өткен Мұғалімдердің мәртебесі туралы арнайы үкіметаралық конференция себеп болған. Оның нәтижесі бойынша ЮНЕСКО мен Халықаралық еңбек ұйымы «Мұғалімнің мәртебесіне қатысты ұсынымдар» деп аталатын құжатқа қол қойған. Дүниежүзілік мұғалімдер күні алғаш рет 1994 жылы 5 қазанда атап өтілді.
