Наурыз мейрамы – түркі және парсы халықтарының көне мерекелерінің бірі. Бұл мейрамды тойлау елімізде мекемелер мен ұйымдардан бастап, жыл сайын кеңінен қанат жайып, өзінің лайықты орнын табуда. Күн мен түн теңелген тұста әз-Наурызды облыс орталығының жұртшылығы да салтанатты түрде атап өтті.
Ата-бабамыз Ұлыстың ұлы күні «Бабаның еккені балаға сая» деп, келер ұрпаққа сая болсын деген ниетпен жер төсіне ағаш отырғызған. Осы жылғы Наурыз мейрамының бастау алар тұсында облыс әкімі Марат Сұлтанғазиев бас болып қала ақсақалдары мен тұрғындар 1-ықшамаудандағы №17-18 үйлердің ауласына ағаш көшеттерін отырғызып, осы бір көмескі тарта бастаған көне дәстүрді қайта жаңғыртты.
Қаланың бас алаңындағы Наурыз тойының ашылу рәсімінде салтанатты шараның басталғаны хабарланысымен әжелердің шашу шашып шыққан сәті дүрмекті тойдың мәртебесін асқақтатты.
Қала әкімі Нұрлан Құматаевтың жиналған қауымды Наурыз мерекесімен құттықтауынан кейін сахнада әншілер әуелеген әсем әндерімен дүйім жұрттың құлақ құрышын қандырды. Мың бұралған бишілер мерекеге сай әсем безендірілген сахнаны бимен көркемдеп, одан бетер құлпыра түскендей әсер қалдырды.
Қаз-қатар тігілген ақшаңқан үйлердің жанында Ұлттық салт-дәстүрді насихаттау мақсатында қойылған бағзы замандардан халқымызбен бірге жасасып келе жатқан тебіреністі көріністер мереке салтанатының көрігін қыздырды. Арнайы шақырылған меймандар, еңбек ұжымдарының қызметкерлері, қала тұрғындары мен қонақтары наурыз көже мен мерекелік дастарханнан дәм татты. Күнқағарлар астында да бірқатар ұжым арнайы дастархан жайып, наурыз көже, түрлі тағамдар мен тәттілер үлестірді.
Айжарық КӨПТІЛЕУОВ
Қонаев қаласы
