Әр қиындықтың өзіндік себебі болады. Жанар-жағар майдың ахуалы да сондай. Әлемді шарпыған қымбатшылық бізге де салқынын тигізіп жатыр. Оның үстіне Украина мен Ресей арасындағы жанжал, солтүстік көршімізге батыс елдері тарапынан салынған санкциялар да әсер етпей қойған жоқ. Енді міне амалдың жоғынан бензин мен дизель отыны да қымбаттайын деп тұр.
Оның бизнеске, өндіріске, өнім өндірушілерге оңайға соқпайтыны анық. Десек те, бұл уақытша қиындық деп ойлаймын. Үкімет шаруаларға берілетін жанар-жағармайдың бағасын тұрақты ұстап тұруға уәде беріп отыр. Бұл өте дұрыс шешім. Себебі, азық-түлік өнімдері – сәт сайын тұтынатын тауар. Жанармай бағасының өсуінен оның өзіндік құны қымбаттаса, қиналатын қалың бұқара. Ендеше, шаруаларды, азық-түлік өндірушілерді бюджет есебінен осылай қолдаса, бұл саладағы қымбатшылық аз да болса ауыздықталатын еді. Сөз жоқ, ұзамай бәрі өз қалыбына түседі деп үміттенеміз.
Талғат Жекебаев,
«Кенже» шаруа қожалығының төрағасы
Еңбекшіқазақ ауданы
