Кеген ауданының Жалаңаш ауылындағы орман шаруашылығында 100 түп қарағай мен 42 мың дана Шренк шыршасын мектептерге табыстау рәсімі өтті. Президент Қасым-Жомарт Тоқаевтың елді мекендерде 15 миллион ағаш егу бастамасына сай Алматы облысында да түрлі шаралар ұйымдастырылып жатыр. Айталық, Кеген ауданына 3200, Балқаш ауданына 2300, Қарасай ауданына 5200 түп ағаш табыс етілді.
«Бұл шын мәнінде елді мекендердің кемел келешегін қамдап, өсіп-өркендеуі үшін жасалып отырған бірден-бір игілікті іс деп ойлаймын. Тұқымынан өсірілген Шренк шыршасының 4 жылдық екпе көшеттерін осы деңгейге жеткізу үшін қаншама күш жұмсалған. Сондықтан қолға тиген көшеттерді одан әрі өсіру үшін еңбектену қажет», – деді Кеген орман шаруашылығының директоры Айболат Солтанғазиев.
Айта кетейік, аталған орман шаруашылығының мамандары орман қорының 42 гектар алқабына 285 мың дана шырша көшетін отырғызды. Қазіргі таңда тұрақты тұқымбақта шыршаның бір жылдық екпе көшетінен бастап 4 жылдық көшеттерге дейін күтіп-баптау жұмыстары қызу жүргізіліп жатыр.
