Бұл туралы “Самұрық-Қазына” қорының басшысы Нұрлан Жақыповтың өңірге іссапарында мәлім болды.
«Қапшағай СЭС» жұмысымен танысқан қор басшысы электр энергиясын реттеуші Кербұлақ СЭС-ін салу жоспарланып отырғанын айтты.
«Әкімдікте жаңа су электр станциясын салу туралы талқыладық. Бұл нысан Қапшағай СЭС-не түсіп отырған артық жүктемені немесе энергия жетіспеушілігін реттеп отырады. Бөген қазіргі СЭС-тен 23 шақырым жерде орналасады. Әзірше, қанша аумақты алатыны белгісіз. Себебі, жобалық-сметалық құжаты мен техникалық-экономикалық негіздемелері енді дайындалады. Ал әкімдік жердің пайдалану мақсатын қайта рәсімдеуде көмектеседі, мұндайда жергілікті органның қолдауы маңызды. «Самұрық-Энерго» мен «АлЭС» компаниялары әкімдікпен үнемі байланыста болмақ», – деді тілшілерге берген сұхбатында қор басшысы Нұрлан Жақыпов.
Сондай-ақ ол еліміздегі СЭС-тер маневрлік қуаттың негізгі көзі екенін атап өтті. Қор басшысының сөзінше, олар ауа райына байланысты күн мен желдің энергиясын өндіру тұрақсыз болған кезде қуаттылығын арттырады.
Кербұлақ СЭС жобасы 2026 жылға дейін жүзеге асырылады.
