Бүгін Алматы облысында бірлік мерекесі кең көлемде атап өтілді. Облыс орталығында дүбірлеген той болса, Талғар ауданында Қазақстанда алғаш рет ұйымдастырылып отырған ұшқыр бәйге жарысы өтті.
Енді “Qazaq World Cup” деп аталатын бұл жарыстың түрі елімізде әр екі апта сайын өтеді. Ал бүгінгі жарысқа Қазақстанның түкпір-түкпірінен 40 сәйгүлік қатысты. Жарыс ережесі бойынша тұлпарлар 6 топқа бөлініп, бақ сынады. Яғни, бір шақырымдық және 1800 метрлік, сондай-ақ 2 және 3 шақырым аралыққа тізгін босатып, кім жылдамды анықтады. Жүлде қоры 20 миллион теңгеден асады.
Облысы әкімі салтанатты ашылу рәсімінде әуелі сөз басын бүгінгі бірлік күнімен құттықтаудан бастады. Ел жұртқа ауызбіршілік пен татулық, бақыт пен берекелі өмір тіледі. Әрі басқадан бәсі басым тұратын ұлттық ат спортының жанжақты дамуына қолдан келгенше қолдау көрсететінін жеткізді. Қазақ елі бар жерде бағзыдан қанға сіңіп, жастарды ептілікпен тектілікке тәрбиелейтін бұл атбегілік өнері өрге жүзе беретінін тілге тиек етті.
Шараға қатысқан Қазақстан ұлттық спорт қауымдастығының президенті Исламбек Салжанов бұл турнир қарашаға дейін әр екі апта сайын өтетінін айтты.
“Енді бірінші мамырдан бастап 15 қарашаға дейін әр екі апта сайын осы бәйгені ұйымдастырып отырамыз. Тұңғыш рет өткізіп отырғандықтан халық қалай қабылдайтынын бақыладық. Бұл бәйгеде 20 миллион теңгеден аса жүлде қоры бар”, – деді қауымдастық басшысы.
Сондай-ақ атшабарда ат ерлеген жігіттер аударыспақ, теңге ілу, қыз қуу, садақ ату секілді ұлттық ойындарда бақ сынасты. Ал сахна сыртында еріктілер гір тасы мен қошқар көтеруден, ләңгі теуіп, қол күресуден жарысты. Барлық ойынның жеңімпаздары бағалы сыйлықтармен марапатталды.
