Аталған шара Халықаралық музейлер күніне орай ұйымдастырылды. Облыстық мәдениет басқармасы мамандарының айтуынша, шараның «Музейлер түні» аталуының өз себебі де бар.
«Музейлер көрермендер үшін түнге дейін жұмыс істеген. Сондықтан фестиваль атауын сол дәстүрге сай қойдық. Шараға облыстағы 15 музей қатысып жатыр. Музейлер бірнеше жыл бойы осынау халықаралық акцияның өтуіне септігін тигізіп келеді. Бірақ, әр кезде бұл фестивальдің бағдарламасы әртүрлі болады. Биыл Қонаевта музейдің жоқтығына байланысты фестиваль ашық аспан астында өткізіліп жатыр», – деді облыстық музейлер бірлестігінің басшысы Әнуар Үмбеталиев.
Шара барысында шатырлар астына тарихымыздың түрлі қырынан сыр шертетін жәдігерлер, Қонаев қаласының мұрағаттағы суреттерінен галерея қойылды. Бұл жерден «Алтын адамды» да, өр рухты батырлардың да, 50 литрлік самаурынды да, жан-жануарлардың да бейнесін көруге болады. Жиналған жұрт таң-тамаша болып, естелікке фотоға түсіп жатты.
Бұл ондай-ақ концерт қойылып, ән шырқалды, күй ойнатылып, өнерпаздар би биледі. Тұрғындар осындай үлкен шараның өткеніне қуанып, сезімдерімен бөлісті.
Alatau News
