Мәжілістің жалпы отырысында депутат Ардақ Назаров мал бағудың машақаты мен қиындығын алға тартып, малшылар мәртебесін көтеруді ұсынды.
«Мен де ауылдың баласымын. Мал бағудың қиындығын жақсы білемін. Жаздың ми қайнатар ыстығы, көктем мен күздің жаңбырлы күні және қыстағы қақаған аязға қарамастан малды аман сақтау олардың міндеті. Осыны ескере келе малшылар мәртебесін көтеруді ұсынамын», – деді Мәжіліс депутаты.
Оның айтуынша, малшылардың балалары үшін арнайы мектеп-интернат ашылып, жоғары оқу орнына түсуге грант бөлініп, ҰБТ тапсыру кезінде жеңілдіктер қарастырылуы қажет. Оларға тегін медициналық қызмет көрсетіліп, шипажайға жолдама берілуі тиіс. Мемлекеттік бағдарлама бойынша тұрғын үймен қамтамасыз етілуі керек.
Сондай-ақ, депутат малшының зейнетке шығу жасын төмендету керектігін де алға тартты.
«Жоғарыдағы айтылған ұсыныстар ескеріліп, малшылар мәртебесі көтерілсе, ата кәсіпке қызығушылар саны артады. Соның арқасында мал басы көбейетін еді», – деді Ардақ Назаров.
