Қарадала төсінде 10 халық театрының басын қосқан «Заманауи Қазақстандағы ұлт руханияты» атты облыстық семинар өтті.
Игі шарада ҚР халық әртісі, Мемлекеттік сыйлықтың лауреаты, Қазақстан театр қайраткерлері одағының төрағасы Тұңғышбай Жаманқұлов, мемлекеттік «Дарын» жастар сыйлығының иегері, Ғ.Мүсірепов атындағы Қазақ мемлекеттік академиялық балалар мен жасөспірімдер театрының көркемдік жетекшісі Фархат Молдағали, Т.Жүргенов атындағы Қазақ ұлттық өнер академиясы мен Ж.Елебеков атындағы эстрада-цирк колледжінің ұстазы, сахна сайысының, пантомима өнерінің ұстазы Ернар Тіленшиев, театр және кино гримінің маманы Аида Шайзада, ҚР Мәдениет қайраткерлері – Мұхаметжан Мырзакеев, Әділхан Қабышевтар шеберлік сағатын өткізді.
Семинарда Тұңғышбай Жаманқұлов Алматы облысының әр ауданынан жиналған сахна тарландарына алғысын жеткізді.
– Халық театрлары ешкімнің қолдауынсыз, ақырындап өздері бас көтере бастады. Бұрынғы жабылғандары қайта ашылды. Сол бірқатар театрлардың басында менің шәкіртім Асқар Наймантаев жүрді. Біз енді, міне, сол театрларға көмектесуіміз керек. Оларға штаттар бөліп, сахналық костюмдер мен декорацияларының жаңаруына күш салуға тиіспіз. Осы жұмыстарға мемлекет тарапынан көңіл бөлінсе, – деді Тұңғышбай Жаманқұлов.
Семинарда халық театрының өнерпаздары кәсіби мамандардың ақыл-кеңесін тыңдады. Қазақстан Республикасының халық әртісі Тұңғышбай Жаманқұлов пен Ғ.Мүсірепов атындағы Қазақ мемлекеттік академиялық балалар мен жасөспірімдер театрының көркемдік жетекшісі Фархат Молдағали аудандық театрлардың жетекшілері мен режиссерлерін бөліп алып, сан сұраққа жауап беріп, театрлардың репертуар саясатын, пъесамен жұмыс істеу тәсілдерін үйретті.
Сахна сайысы маманы Ернар Бейсенбек қолма-қол төбелестен бастап, қару-жарақ құралдарын қолдану, техникалық қауіпсіздік ережелерін, әйгілі Джеки Чанның «сайыс хореографиясы» дегені не екенін халық театрының актерларына түсіндірді. Ал гримдеудің кәсіби маманы Аида Шайзада болса театр, кино әртістеріне гримді қалай қолданудың құпияларымен бөлісті.
Бір күнге созылған семинардың қорытындысында қонақтар мен театр ұжымдары марапатталды. Аталмыш шараны ұйымдастырушы белгілі режиссер, актер, Қазақстанның еңбек сіңірген қайраткері Асқар Наймантаев Алматы облыстық мәдениет басқармасы мен облыстық халық шығармашылығы орталығына алғысын білдіріп, өнермен өмірін мәнді етіп отырған әр жанға ризашылығын жеткізді.
Анар Дүйсенбайқызы,
Ұйғыр ауданы
