Қарасай ауданындағы «NOMAD» этноауылында «Көшпенділер әлемі» деген тақырыпта танымдық фестиваль өтті. Аталған шара жас ұрпақтың тарихымызды тереңнен тануына мүмкіндік берді.
Қонақтар көшпенділер әлемімен қайта қауышқандай әсерге бөленді. Онда ата-бабаларымыз киген сауыт-сайман мен қару-жарақтардың үлгілері жұртшылық назарына ұсынылды. Бұдан кейін шараны ұйымдастырушылар жауынгерлердің жекпе-жек сайысы, қаруларды шебер пайдаланудың әдіс-тәсілдерін көпшілікке паш етті. Сонымен қатар, теңге алу, аударыспақ, жамбы ату, көкпар сияқты ат үстіндегі ұлттық ойындар да қонақтардың делебесін қоздырды.
«NOMAD» этноорталығы ашық аспан астындағы тірі музей болып есептеледі. Олай дейтін себебеміз, өзге мұражайларда жәдігерлерге қол тигізуге тыйым салынатын болса, біздің экспонаттарымызды қолмен ұстап, тіпті, үстіңе киіп көруге де рұқсат етіледі», – дейді этноауылдың негізін қалаған Жандос Нұрбеков.
Оның айтуынша, бұл орталық ресми түрде 2018 жылы ашылған. Жобаны жүзеге асыруға Жандоспен бірге Нұрлан Лахан, Данияр Байдаралин және Станислав Потапов та өз үлестерін қосқан. Этноауылдың көгалдануына, жылқылармен толығуына Шамалған ауылының тұрғыны Серік Бакишевтің де көмегі көп тиген.
«Адам жылқыны қолға үйретіп, атқа қонған кезден басталған көшпенділер өркениеті адамзат дамуының бастауында тұрғанын неге айтпасқа?! От қаруы дүниеге келгенге дейін әлемдік маңызды процестердің барлығы көшпенділер қолымен жасалғанын әлем мойындауы керек. Жас ұрпақ осыны жадына сақтап, ұлы бабаларымыздың жалғасы екендіктерін ұмытпаса, болашаққа сеніммен қарайтын болады», – дейді Жандос Нұрбеков.
Қуат Қайранбаев
