Ұлттық экономика министрлігі елімізде коммуналдық қызмет тарифтерінің қандай шекте қымбаттайтынын түсіндірді. Елордада өткен үкімет отырысында ұлттық экономика министрі Әлібек Қуантыров «Тарифті инвестицияға айырбастау» бағдарламасын іске асыру туралы баяндама жасады.
Бағдарлама тарифтерді қымбаттатып, одан түскен қаржыны коммуналдық инфрақұрылымның жай-күйін жақсартуға құрылған. Министрдің дерегінше, елімізде барлық инженерлік инфрақұрылымның тозу деңгейіне қарай қызыл, сары, жасыл аймақ болып үш топқа жіктелген. Инвестиция ең алдымен жылумен жабдықтау желілері қатты тозған аймақтардағы кәсіпорындарға салынады.
Мәселен, елімізде жылумен қамтитын 27 кәсіпорын инфрақұрылымының 65 пайызы тозған. Бұл кәсіпорындарға биыл 112 млрд теңге бөлу жоспарланып отыр. Осының нәтижесінде келесі жылы 6 кәсіпорынның жылу жүйелері жақсарады деген болжам бар.
Электрмен қамтамасыз ету саласында 16 кәсіпорынға 92 млрд теңге инвестиция, сумен қамтуда 13 кәсіпорынға 29,5 млрд теңге инвестиция тартылады.
Министр осыған байланысты жылу мен электр қуаты 20 пайызға, ауызсу 25 пайызға қымбаттайтынын, мысалы 2 бөлмелі пәтер иесіне жылу, электр қуаты, ауызсу үшін айына төлейтін ақшасы орташа есеппен 3-4 теңгеге көбейетінін айтты.
Дегенмен, Қуантыров тарифтердің қымбаттауы аз қамтылған отбасылардың табысына әсер етпейді дегенді алға тартады. Себебі жергілікті бюджет есебінен аз қамтылған отбасыларға коммуналдық қызметтерге ақы төлеу үшін тұрғын үй көмегі беріліп жатыр. Ол коммуналдық қызметтерге жұмсалатын шығын отбасының ай сайынғы орташа жиынтық табысының 10%-нен асып кеткен жағдайда төленеді.
