Елімізде биыл қыркүйекте балабақша педагогтерінің жалақысы 30 пайызға көтеріледі. Бұл туралы бүгін Астанада өткен баспасөз мәслихатында Оқу-ағарту министрлігі Мектепке дейінгі білім департаментінің директоры Наталья Жұмаділдаева айтты. Оның сөзінше, республика балабақшаларында 98 мың педагог жұмыс істейді.
«Білім сапасы педаогтердің кәсіби құзіреттілік деңгейіне тікелей байланысты. Республиканың мектепке дейінгі ұйымдарында жұмыс істейтін 98 мың педагогтың 65,3 мыңының жоғары, ал 31 мыңының техникалық және кәсіптік білімі бар. Ауылдық жерде – 41 596, қалалық жерде – 55 811, мемлекеттік мектепке дейінгі ұйымда 58 203, жекеменшік мектепке дейінгі ұйымда 39 714 педагог еңбек етіп жүр. Биыл мектепке дейінгі ұйымдардың 20390 педагогының біліктілігін арттыру жоспарланған», – деді Наталья Жұмаділдаева.
Бұған дейін мемлекет басшысы үкіметке тәрбиешілердің мәртебесін көтеру, кәсіби әлеуетін арттыру және жалақысын көтеруді тапсырған еді.
Министрлік өкілінің сөзінше, соңғы төрт жылда тәрбиешілердің жалақысы кезең-кезеңімен 25 пайызға өсті. 2023 жылдың қыркүйегінен бастап жалақы тағы 30 пайызға өсетін болады. Сонымен қатар мектепке дейінгі тәрбие мен оқытудың үздік тәжірибелерін тарату үшін 79 мектепке дейінгі ұйымдарда тұрақты негізде «Құзыреттілік орталықтары» жұмыс істейді.
