Алматы облысының полицейлері 24 тамыз күні “Құқықтық тәртіп” жедел алдын алу іс-шарасы шеңберінде Талғар ауданының аумағындағы орманнан бірнеше қару мен оқ-дәрі тауып, тәркіледі.
Табылған қару-жарақ арасында МЕ-8 Police газ тапаншасы мен бір ОСА травматикалық тапаншасы бар. Сонымен қатар 5,6 мм калибрлі ТОЗ иір ойықты мылтық, 3 LSG гранатасы, 3 дана жарық-дыбысты гранаталар және 7,62 мм калибрлі 15 патрон, оқ-дәрілер табылды.
Алматы облысы Полиция департаментінің бастығы Бауыржан Әленовтің айтуынша, бұл дерек бойынша полиция Қылмыстық кодекстің 287-бабы 3-бөлігімен ( Атыс қаруын тегiс ұңғылы аңшылық қаруынан басқа), оқ-дәрiлердi, жарылғыш заттарды немесе жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру) іс қозғады. Қазіргі уақытта барлық тиісті сараптамалық зерттеулер тағайындалып, тергеу әрекеттері жүргізіліп жатыр.
