Өнеркәсіптік өндіріс орындары ауаның ластануына өз әсерін тигізетіні анық. Әсіресе, металлургия, машина жасау, энергетика және мұнай өңдеу зауыттарының зияны шаш етектен. Осы орайда өндірістің қоршаған ортаға әсерін азайту үшін түрлі экологиялық іс-шаралар өтіп, табиғатты қорғаудың жүйелі жоспары әзірленген. Өңірлік коммуникациялар қызметінің алаңында аймақтағы экологиялық ахуал айтылып, табиғатты қорғауға арналған жұмыстар жайы тарқатылды.
Брифинг спикері, облыстық экология департаменті басшысының орынбасары Бақытжан Молдахметов өңірдегі өндіріс орындарында ауа сапасын жақсартуға арналған жұмыстарды тілге тиек етті. жіпке тізді. Алдымен, ҚР Экологиялық кодексінің 96-бабы 1-тармағына сәйкес қоршаған ортаны қорғауға бағытталған шаралар кешенін таныстырып, барлық іс-жоспар мемлекеттік бюджет есебінен жүргізілетінін жеткізді. Сондай-ақ, табиғи ресурстарды пайдаланушылардың қаражаты, ҚР заңнамалық актілерінде тыйым салынбаған өзге де көздер арқылы кешенді жоспар жүзеге асып, экологиялық қауіпсіздік қарастырылғанын айтты. Бақытжан Молдахметов «АлЭС» АҚ табиғатты қорғау қызметі жөнінде ақпарат тарқатып, жылу электр орталығының негізгі қызметін де сөз етті.
– «АлЭС» АҚ қоршаған ортаны қорғау саласындағы басым инвестициялық жобаларды тартуға және іске асыруға ұдайы назар аударады. Бұл саладағы басым бағыттар тазарту құрылыстарын жарақтандыру. Атмосфералық ауаға шығарындыларды 30%-ға азайтуға мүмкіндік беретін азотты басу үшін оттық құрылғылар орнатылған. Жыл сайын қоршаған ортаны қорғау іс-шараларын жүзеге асыру шеңберінде орталықтың қазандық агрегаттарындағы күл жинау құрылғыларын тазалау дәрежесін сақтау, қазандық қондырғысының оттықтарын жөндеу, қазандықтағы турбиналық сорғы жабдықтарын жаңарту жұмыстары жүргізіледі. Химиялық цехтар, судың жоғалуын азайту бойынша да аймақта бірқатар шаруалар атқарылды, – деп айтып өтті.
Бүгінгі таңда қоршаған ортаға түсетін салмақты айтарлықтай азайту мақсатында көгілдір отын жағатын станса салынбақ. Бұл жобаны жүзеге асыру күкірт диоксиді мен көмір күлін жойып, зиянды шығарындыларды 88%-ға азайтпақ. ҚР экологиялық және санитарлық-эпидемиологиялық заңнамасының талаптарын орындау үшін «АлЭС» АҚ-да қалдықтарды бөлек жинау жүйесі де енгізілген. Өндірістік бөлімшелерде өндіріс және тұтыну қалдықтарын жинау үшін жеке учаскелер пайдалануға берілген.
Құралбек СӘБИТОВ
