Келесі жылдан бастап ел азаматтары төлқұжат пен жеке куәлік рәсімдеу кезінде саусақ таңбасын тапсыруға міндеттеледі. Бұл жайында Ішкі істер министрлігінде өткен баспасөз мәжілісінде Көші-қон комитетінің аға инспекторы Нұржан Жаңабаев мәлімдеді.
«Дактилоскопиялық тіркеу – бұл саусақтардың папиллярлық үлгілерінің құрылымдық ерекшеліктері туралы ақпарат алу. Міндетті дактилоскопиялық тіркеу елімізде 2024 жылдың 1 қаңтарынан басталады. 12 жасқа дейінгі балалардан басқа, Қазақстанның барлық азаматы және елімізде тұрақты тұратын шетелдіктер дактилоскопиялық тіркелуі тиіс. 12 жастан 16 жасқа дейінгі балалар үшін дактилоскопиялық тіркеуден өту, өтпеу өз еркінде болады. Саусақ іздерін алу Халыққа қызмет көрсету орталықтарында азаматтар жеке куәлікті, төлқұжатты, шетелдіктер елде тұруға ықтиярхатты және азаматтығы жоқ адамның куәлікті ресімдеуі кезінде жүргізілетін болады”, – деді Нұржан Жаңабаев.
Аға инспектордың айтуынша, дакңтилоскопиялық тіркеу адам мүдделерін қорғау, оның заңды құқықтарын, денсаулығы мен қауіпсіздігін қамтамасыз ету мақсатында алынады. «Біріншіден, бұл іс-шаралар жеке тұлғаларды биометриялық сәйкестендіруді жетілдіруге бағытталған, бұл өз кезегінде заңсыз құжат рәсімдеудің алдын алуға, құжаттарды қолдан жасаудан, олардың иелерін алаяқтық және өзге де қылмыстық әрекеттерден қорғауға мүмкіндік береді», – деді Жаңабаев.
Комитет өкілінің айтуынша, саусақ іздерін алу процесінен бас тартқан жағдайда азаматқа Әкімшілік құқық бұзушылық кодексінің 443-1-бабына сәйкес жаза қолданылады.
