«Тамғалы-Тас» шатқалындағы оқу-жаттығу полигонында «Қазқұтқару – 2023» халықаралық жарысы басталды.
Аталған бәсекеде Әзербайжан, Түркия, Венгрия, Қазақстан, Қырғызстан және Өзбекстанның құтқару бөлімшелері құтқару көпсайысында кәсіби шеберліктерін жан-жақты көрсететін болады.
Жарыстың салтанатты ашылу рәсімінде ҚР Төтенше жағдайлар министрі Сырым Шәріпханов, Алматы облысының әкімі Марат Сұлтанғазиев маңызды іс-шараның басталуымен құттықтап, қатысушыларға сәттілік тіледі.
«Біз халықаралық тәжірибені жан-жақты зерттеп жатырмыз, осы тәжірибе алмасу құтқару жұмыстарының сапасына әсер ететіні сөзсіз», – деді Сырым Шәріпханов.
Салтанатты ашылу рәсімі барысында қираған ғимараттар мен құрылыстарда, таулы жерлерде іздестіру-құтқару жұмыстарын жүргізу, әуе және теміржол көлігінде, химиялық қауіпті объектіде аварияны жою, өртті сөндіру және акваторияда зардап шеккендерді құтқару бойынша авариялық-құтқару қызметтерінің көрсетілімдері өтті.
«Алматы облысының әкімдігі құтқару бөлімшелерінің, оның ішінде «Жартасты қала – Астана» оқу-жаттығу полигонының материалдық – техникалық базасын нығайтуға жан-жақты көмек көрсетуде. Ең бастысы жарыстың барлық кезеңдері жарақатсыз және жазатайым оқиғаларсыз өтуіне тілектеспін», – деді облыс әкімі Марат Сұлтанғазиев.
Бас төрешілер алқасы мен төрешілер отырысынан кейін құтқарушылар командасы жарысқа кірісті.
Жарыс 20 қыркүйекке дейін жалғасады.
