Мемлекет басшысы Қасым-Жомарт Тоқаев Алматы облысына жұмыс сапары барысында ауыл шаруашылығы тауарлары мен құрылыс материалдарын өндірушілердің көрмесіне барды, деп хабарлайды Ақорданың баспасөз қызметі. Көрмеге ауыл шаруашылығы саласы бойынша ет, құс, сүт және балық өнімдерін өңдеу кәсіпорындарының, сондай-ақ шырын, сусын өндірушілердің, көкөніс және жеміс өңдеушілердің өнімдері қойылды.
Көрмеде мемлекет басшысы шаруалармен әңгімелесіп, өңір климаты мен мегаполиске жақын орналасуы бұл салаға инвесторлар тартуға зор мүмкіндік беретінін атап өтті.
Президенттің айтуынша, өңірде ерекше бағыт – түйе шаруашылығы қарқынды дамып келеді және аталған саланың экспорттық әлеуеті зор.
– Ауыл шаруашылығы өндірісіне жаңа технологияларды енгізу, экологиялық таза өнім шығару маңызды, – деді Қасым-Жомарт Кемелұлы.
Сонымен қатар Президентке отандық құрылыс материалдарының көптеген түрі таныстырылды. Қазақстанда өнеркәсіптік және азаматтық нысандар құрылысына қажетті барлық материал толықтай өндіріледі. Атап айтқанда, көлденең желімделген ағаш, құрама темірбетон және бетон құрылғылары, автоклавты газоблоктар, талшықты цемент плиталары мен шыны мақта, құрғақ құрылыс қоспалары мен әрлеу материалдары, бояулар мен жабындылар, алюминий профильдері, панельдер, диодты шамдар, есік тұтқалары және басқа да өнімдер шығарылады.
Мемлекет басшысы құрылыс саласының жай-күйі туралы айта келе, аталған саланы экономиканы дамытудың қозғаушы күші ретінде атап өтті.
– Қазір құрылыс саласы бойынша өңірдің алдында ауқымды міндеттер тұр. Атап айтқанда, облыс орталығының құрылысы және G4 City жобасы. Бұл жұмыста жергілікті өнім өндірушілердің құрылыс материалдарының әлеуетін барынша пайдалану маңызды. Мемлекет отандық өнім өндірушілерді қолдайды. Бұл туралы мен өз Жолдауымда нақты айттым, – деді Қасым-Жомарт Тоқаев.
Көрмеге 20-дан астам қазақстандық тауар өндірушілердің, соның ішінде «Шин-Лайн» ЖШС, Dinara Group агрохолдингі, «Дәулет-Бекет» ЖШС, «ПК Алтын Таға» ЖШС, «Фирма-Бент» ЖШС, «Кнауф Гипс Қапшағай» ЖШС және басқа да ірі компаниялардың өнімдері қойылды.
