Алматы облысы Қазақстанның жалпы ішкі өніміндегі (ЖІӨ) үлесі ең көп 5 өңірдің қатарына енді. Finprom.kz сайтының хабарлауынша, биыл әлемдік геосаяси жағдайдың ушыға түскеніне қарамастан, Қазақстан экономикасының өсімі артқан. Экономикалық көрсеткіштердің жақсаруына өңірлер мен қалалардың қосып отырған үлесі ерекше.
Атап айтсақ, 2023 жылдың алғашқы тоқсанында елдің ЖІӨ көлемі 23,6 трлн теңгені құрап, былтырғы жылдың алғашқы тоқсанымен салыстырғанда 5 пайызға артқан. Оның ішінде аймақтар жан басына шаққандағы өнім көлемі Алматы қаласында бір жылдың ішінде бірден 13,9 пайызға артқан. Бұл республика бойынша орташа көрсеткіштен 2,5 есеге асып түседі.
Ұлытау облысы мен Жетісу облысында да аймақтық жан басына шаққандағы өнім көлемі тиісінше 13 және 11,4 пайызға өскен. Әйтсе де Қарағанда облысы мен Ақтөбе облыстарында бұл көрсеткіш керісінше төмендеген.
Жалпы биыл қаңтар-наурыз айларында Қазақстан ЖІӨ-нің бестен бірі – 20,2 пайызы еліміздің ең ірі мегаполисі Алматы қаласының үлесіне тиген. Одан кейінгі орындарда мұнайлы Атырау облысы (14,1 пайыз), Астана қаласы (10,3 пайыз), Қарағанды облысы (6,9 пайызы) және Алматы облысы (4,3 пайыз) орналасқан. Ең аз көрсеткіш Жетісу облысында (1,3 пайыз).
