Қазақстан Қорғаныс министрінің тапсырмасы бойынша жасақталған ақпараттық-түсіндіру тобы ел өңірлерінде «Жаңа Қазақстанның тірегі – айбынды жастар» шарасы аясында өз жұмысын бастады. Оның қызметінің негізгі бағыттары – қоғамда әскери қызметті дәріптеу, жоғары әскери оқу орындарына түсу бағытында үгіт-насихат жұмыстарын жүргізу және сол арқылы жастарды отаншылдыққа тәрбиелеу.
Талғар қаласындағы №25 мектеп-гимназиясының үлкен мәжіліс залында Қорғаныс министрлігі өкілдерінің осы қалада орналасқан жалпы білім беру мекемелерінің жоғары сынып оқушыларымен кездесуі болып өтті. Шараға сондай-ақ «Жас сарбаз» республикалық әскери-патриоттық қозғалысының белсенділері қатысты.
Кездесу басында сөз алған Қорғаныс министрлігі білім және идеологиялық жұмыстар басқармасының аға офицері, полковник Данияр Құдайбергенов мектеп бітіруші жастарға мамандық таңдау жөнінде өз ақыл-кеңесін айтып, осы тұрғыда әскери борышын өтеген жастарға қандай жеңілдіктер берілетіні жайында кең көлемде түсінік берді.
– Биылдан бастап әскери борышын өтеп келген азамат еліміздің кез келген жоғары оқу орнында грант есебінен тегін оқи алады. Қазірдің өзінде әл-Фараби атындағы Қазақ ұлттық университетіне, Еуразия университетіне, еліміздің басқа да жоғары оқу орындарына түскен жастарымыз бар. Бұл – жастарға жасалып отырған үлкен мүмкіндік және қамқорлық. Сондықтан әскерге баруға талпыныңыздар, ұмтылыңыздар, – деді Данияр Құдайбергенов.
Ол сонымен қатар әскери борышын өтеген жастардың әскери қызметті жалғастыру үшін арнайы әскери жоғары оқу орындарына түсуіне де мүмкіндігі барын атап өтті.
-Бүгінде еліміздің аумағында бірнеше жоғары әскери оқу орны бар. Егер сіздер мектеп бітіргеннен кейін тағдырларыңызды армиямен байланыстырып, Отан қорғаушы деген қасиетті мамандық иесі атанғыларыңыз келсе, офицер болғыларыңыз келсе, сол жоғары әскери оқу орындарына түсе аласыздар. Мысалы, Алматы қаласында Кеңес Одағының батыры, Халық қаһарманы, Қазақстанның тұңғыш Қорғаныс министрі, армия генералы Сағадат Қожахметұлы Нұрмағамбетов атындағы Құрлық әскерлері әскери институты орналасқан. Сол әскери институтта тегін тамақ, тегін киім-кешек, тегін жатақханамен қамтамасыз етіліп, тегін білім алуға болады. Бұл институтты бітірген офицер ешқашан жұмыссыз қалмайды, оқу орны өзі жұмысқа орналастырады. Алматыда орналасқан тағы бір жоғары әскери оқу орны, ол –Радиоэлектроника және байланыс әскери-инженерлік институты. Ол жерде де офицер атанғаннан кейін өздері жұмысқа орналастырады.
Ақтөбе қаласында Кеңес одағының екі мәрте батыры Талғат Бигелдинов атындағы әскери ұшқыштарды дайындайтын Әуе қорғанысы күштерінің әскери институты орналасқан. Оны бітіріп, сіздер ұшқыш маман офицер ретінде қызмет ете аласыздар. Сондай-ақ Астана қаласында Сағадат Нұрмағамбетов атындағы, Щучинск қаласында Шоқан Уәлиханов атындағы әскери колледж бар, – деді полковник Данияр Құдайбергенов.
Сағадат Нұрмағамбетов атындағы Құрлық әскерлері әскери институтының өкілі, Тәрбие және идеологиялық жұмыстар бөлімінің офицері, майор Мұратбек Құлшанов, сондай-ақ Радиоэлектроника және байланыс әскери-инженерлік институтының Тәрбие және идеологиялық жұмыстар бөлімінің офицері Мирас Калиулин жастарды жоғары әскери оқу орындарында оқуға шақыра отырып, олардағы жеңілдіктер мен артықшылықтар және кейбір ерекшеліктер жөнінде тартымды әңгімеледі.
Айталық, біріншіден, жоғары әскери оқу орындарына түсу үшін мектеп бітіруші түлек оқуға түсетін жылы 30 сәуірге дейін жергілікті Қорғаныс істері жөніндегі департаментке барып өтініш білдіреді. Ол өтінішке жауап ретінде талапкерге қажет құжаттардың тізімдемесі беріледі. Екінші, ҰБТ-дан кемінде 50 балл жинауы керек. Үшінші, жоғары әскери оқу орындарындағы бейіндік пәндер – математика-физика және математика-география. Талапкерлер осы пәндерден кемінде 7 балл, ал қалған пәндерден кемінде 4 балл жинауы керек. Төртінші, ҰБТ-ның нәтижесі мен жиналған құжаттардың барлығын алып, талапкер 15-20 шілде аралығында жоғары әскери оқу орнына тапсырады. Содан кейін комиссия құрылып, қабылдау кезеңі басталады.
Ең бір ерекше айтатын жайт, жоғары әскери оқу орындарына түскен жастарға стипендия беріледі. Жылына екі рет демалысқа шыққанда ауылдарына барып-қайту жолақысы тегін. Сондай-ақ, биылдан бастап қыздар факультеті ашылған.
«Бір сөзбен айтқанда, қазіргі уақытта Отан қорғаушы мамандығын иелену өте абыройлы әрі ол – әрбір азаматтың қасиетті борышы», – деп қорытындылады өз ойын оқушылар алдында тебірене сөйлеген офицерлер.
Шара барысында Қазақстанның Ұлттық патриоттық тәрбие орталығы Алматы филиалы өнерпаздарының қатысуымен тартымды концерт өтті. Ұрмалы және үрмелі аспаптар әскери оркестрінің сүйемелдеуімен өтіп, «Туған ел», «Өз елім», «Жас сарбаз» сияқты ондаған патриоттық әндер шырқалып, 400-ден аса оқушы мен қонақтардың рухын көтеріп, отаншылдық сезімдерін нығайтқаны күмәнсіз.
Әскери тәртіпке сәйкес өте жинақы, әсерлі және жүйелі өткен жиынға Алматы облысының Қорғаныс істері жөніндегі департаментінің өкілдері, Талғар аудандық басқармасының бастығы, подполковник Серік Медеуов қатысты. Шара барысында мектеп фойесінде әйгілі қолбасшы Иван Васильевич Панфиловтың жиен немересі Алуа Байқадамова жетекшілік ететін Алматы қаласы мемлекеттік-тарихи музейі филиалының әскери экспонаттары қойылған көрме ұйымдастырылды. Онда партизандық қозғалыс қаһарманы, снайпер Тілеуғали Әбдібеков, Кеңес Одағының батырлары Тоқтар Төлегенов, Талғат Бигелдинов, панфиловшы батырлардың экспонаттары, сондай-ақ, Сағадат Нұрмағамбетов туралы мәліметтер болды.
Құтмағамбет Қонысбай,
Талғар ауданы
