Мемлекет басшысының тапсырмасына сәйкес еліміздің Денсаулық сақтау министрлігі санитарлық-эпидемиологиялық қызметті дамыту және нығайтуға бағытталған шараларды жүзеге асырып жатыр. Оның аясында биыл республикалық бюджеттен қаражат бөлініп, 60 жаңа көлік сатып алынып, өңірлердің санитарлық-эпидемиологиялық қызмет органдарына ресми түрде тапсырылды.
Автокөлік кілттерін салтанатты түрде табыстау рәсімінің бірі бүгін Қонаев қаласында өтті.
Айтулы шарада Денсаулық сақтау министрлігі санитарлық-эпидемиологиялық бақылау комитетінің жұртшылықпен байланыс басқармасының басшысы Жасұлан Алпысбаев, облыстың санитарлық-эпидемиологиялық бақылау департаментінің басшысы Марат Исмаилов Алматы облысының санитарлық-эпидемиологиялық қызметінің аудандық басқармаларына 14 көліктің кілтін табыс етті.
Жиында Жасұлан Алпысбаев санитарлық-эпидемиологиялық қызметті нығайту және дамыту халықтың санитарлық-эпидемиологиялық саулығына төнетін қатерлерге уақтылы және жедел ден қоюға мүмкіндік беретінін атап өтті.
