Қазақстандағы әйелдер саны ерлер санынан бұрынғыдай басым. Бұл туралы Ұлттық статистика бюросы жариялаған 2021 жылғы халық санағының түпкілікті қорытындысында айтылды.
2021 жылғы санақ қорытындысы бойынша елімізде әйелдердің саны ерлерден жарты миллионға (536,3 мың адамға) артық болды. Пайызбен айтсақ, жалпы халық санындағы ерлер үлесі – 48,6% (9 324 840 адам), әйелдердің үлесі – 51,4% (9 861 175 адам) құрады. Алдыңғы санақпен салыстырғанда ерлер саны 1,6 млн, әйелдер саны 1,5 млн артты, Қазақстанда 1000 әйелге 946 ерден келеді.
“Демография ерекшеліктеріне байланысты 36 жасқа дейінгі ер адамдар саны әйелдерге қарағанда көп, содан кейін ғана олардың саны арақатынасқа салғанда азая бастайды (36 жастан асқан әйелдер саны 736 мың адамға көп). Бұл ретте ерлер мен әйелдердің арақатынасы тек екі өңірде – Қызылорда және Түркістан облыстарында көп, онда 1000 әйелге сәйкесінше 1006 және 1027 ер адамнан келеді.
Алдыңғы санақпен салыстырғанда 15-19 жас және 20-24 жас аралығындағы әйелдер мен ерлердің саны азайғанына назар аударуға болады. Бұл 2009 жылғы халық санағы кезінде 20-24 жас аралығындағы топта туудың ең жоғары кезеңі – 1980-жылдардың екінші жартысында туған ұрпақтың болуымен байланысты”, – деп жазды Ұлттық статистика бюросы.
Ал 2021 жылы бұл жас санатын 1990 жылдардың аяғы мен 2000 жылдардың басында дүниеге келген туу көрсеткіші төмен болған ұрпақ алмастырды. Сол сияқты 15-19 жас санаты бойынша 2002-2006 жылы туған ұрпақ 1990 жылдардың бірінші жартысындағы ұрпаққа қарағанда аз.
2009 жылғы санақпен салыстырғанда 55-59, 60-64 және 65-69 жастағы ер адамдар саны сәйкесінше 50,2%, 117% және 69,5% айтарлықтай өсті. Осы жастағы әйелдер саны да 2009 жылмен салыстырғанда сәйкесінше 38%, 105,9% және 58,3% өскен. Аталған жас тобындағы халықтың өсуі орташа өмір сүру ұзақтығының артуымен, өмір сүру жағдайларының жақсаруымен байланысты.
