Бұл награданы “Жас сарбаз” балалар-жасөспірімдер қозғалысының тәрбиеленушісі Ақжол Нұрланұлы қорғаныс ведомствосының басшысы атынан Десанттық-шабуылдау әскерлерінің қолбасшысы генерал-майор Алмаз Жұмакеев табыс етті. Іс-шараға Десанттық-шабуылдау әскерлерінің қолбасшылығы мен жеке құрамы, Ақжолдың ата-анасы және “Жас сарбаз” қозғалысының тәрбиеленушілері қатысты.
Генерал-полковник Руслан Жақсылықов “Жас сарбаз” әскери-патриоттық клубының тәрбиеленушісі Ақжолға батыл қимылдап, жол-көлік оқиғасының алдын алғаны үшін ізгі тілегін жеткізді. “Ұлдарыңыз сындарлы сәтте атына заты сай нағыз батыр екенін дәлелдеді”, – делінген Ақжолдың ата-анасына жазылған алғыс хатта.
22 қарашада Іле ауданы Өтеген батыр кентіндегі № 24 лицейдің 8 сынып оқушысы Ақжол Нұрланұлы 219 бағытта жүретін автобусқа отырған болатын. Жолай жүргізушінің жүрек талмасы ұстайды. Мұны байқаған Ақжол жүргізуші кабинасына жүгіріп жетіп, тежегішті басып үлгереді. Соның арқасында автобус тұрғын үй қоршауына жарты метр ғана жетпей тоқтайды.
8 сынып оқушысының жедел қимылдауы автобустағы адамдарды ауыр зардаптардан сақтап қалды. Куәгерлердің айтуынша, Ақжол болмағанда автобус үйге соғылатын еді.
Өткен аптада ержүрек оқушы ерлігі еленіп, өзі оқитын мектепте ноутбукпен марапатталды. Алматы облысының әкімі Марат Сұлтанғазиев оған алғыс хат пен соңғы үлгідегі iPhone 15 ұялы телефонын табыс етті.
