Алматы облысында 10 қараша цифрландыру және ақпараттық технологиялар қызметкерлері күніне орай, мектеп оқушылары арасында IT-жобалар байқауы өтті. Облыстық цифрлық технологиялар және білім басқармасының бастамасымен және Іле ауданы әкімдігінің қолдауымен бастау алған шараның негізгі мақсаты облыс оқушылары арасында IT саласын танымал ету.
Байқаудың ашылу салтанатында сөз алған облыстық цифрлық технологиялар басқармасының басшысы Жандос Сәбитұлы, барша қатысушыларға сәттілік тіледі.
«Алматы облысының цифрлық технологиялар басқармасы облыс аумағында ақпараттандыру және цифрландыру саласында бірыңғай саясатты жүзеге асыратын мемлекеттік орган саналады. Ел арасында цифрлық жағдайды жақсартып, ғаламтор қызметінің сапасын арттырудан бөлек, еліміздегі ең жас, әрі үлкен білімді қажет ететін IT саласын дамыту, оны жастар арасында насихаттауда біз атқаратын жұмыстармен астасып жатыр. Бүгінгі байқаудың көздеген мақсаты ғылыми-зерттеу қызметіне және оқуға деген қызығушылықты арттыру, ең талантты және дарынды жас зерттеушілерді анықтап, оларға қолдау білдіру», – деді өз сөзінде Жандос Сәбитұлы.
Екі кезеңнен тұратын облыстық алғашқы ауқымды конкурс 8-10 сынып оқушылары арасында өтті. Байқауға жалпы саны 32 жоба қатысқан, комиссия мүшелері үздік деп таныған 10 жоба ақтық кезеңге жолдама алды.
«Smart City технологиялары» еркін тақырыбы нгізінде өткізілген конкурста қатысушылар қаланың ақпараттық жүйесі, қалалық цифрлық платформа, денсаулық сақтау, білім беру, әлеуметтік сала, энергетика, қалдықтарды басқару, көлік және ұтқырлық, қаладағы қауіпсіздік, экология және өзге де өзекті бағыттар негізінде IT-жобаларды әзірлеп, қазылар алқасының алдында таныстырды.
Байқау ережесіне сай, қатысушыларға жобаны қорғауға 3-5 минут, сұрақтарға жауаптар беруге 3 минут уақыт берілді.
Тың салада жасампаз жол салуға ниетті оқушыларға «SERGEK GROUP», «KazAeroSpace», «Freedom Telecom» сынды елімізге танымал компаниялардың белді өкілдері мен Алматы облыстық білім беру саласындағы ғылыми-тәжірибелік ақпараттық технологиялар орталығынан келген мамандар қазылық етті.
«SERGEK GROUP», «KazAeroSpace» копаниялары байқаудың бас демеушілері болды.
Жарты күнге созылған білімділер додасында кіл мықты ғана жеңімпаз атанды.
Конкурс қорытындысына сай, жүлделі бірінші орынды Жұбаныш Бәрібаев атындағы орта мектептің оқушылары Алижан Асан мен Құралай Орынбаева иемденді. Олардың «Инклюзивті білім беру жағдайында ерекше білім беру қажеттілігі бар балаларды оқытуда қолданылатын мобильді қосымша әзірлеу» атты жобасы үздік деп танылды.
Жүлделі екінші және үшін орынды Талғар ауданы Ілияс Жансүгіров атындағы №37 орта мектебінен келген оқушылар өзара бөлісті.
Екінші орынға «SMART SCHOOL» (Ақылды мектеп) атты жобасы лайық деп танылды. Бұл жұмыстарды Балжан Капаева және Әмина Урусбек қорғап шықса, үшінші орынға «Blender 3D технологиясы- Қазақстанның өткені мен болашағы» деген жұмыстары үшін 8-сынып оқушылары Айдын Оспанғали мен Айша Теміржан табан тіреді.
Жеңімпаздар дипломдарен марапатталып, бағалы сыйлықтар табысталды.
