21 қарашадан бастап Алматы қаласынан Талғар ауданының Тұздыбастау ауылына №232 бағытта автобус қатынай бастады. Бұл туралы almaty-akshamy сайты хабарлады.
Алматы қаласы маңындағы қоғамдық көлік қозғалысын дамыту мақсатында Алматының қалалық мобилділік басқармасы биыл 21 қарашадан бастап №232 қала маңына қатынайтын жаңа бағыт ашты.
Бұл бағыт Тұздыбастау ауылынан («Сұлтан» кешені) «Алматы-2» теміржол вокзалына дейін жүреді. Маршруттағы автобус саны 7, қозғалыс аралығы 20 минут.
Еске сала кетейік, Алматы агломерациясын дамыту аясында 2023 жылы 25 елді мекенді қамтитын қала маңына қатынайтын жаңа 10 маршрут ұйымдастыру көзделген. Бұған дейін 7 маршрут ашылды, қалған екі бағыт әзірленіп жатыр.
Бұған қоса, Алматы және Алматы агломерациясын дамыту жоспарына сәйкес, 2024 жылдың соңына дейін 20 жаңа қала маңы маршрутын ұйымдастыру жоспарға енген, бұл 50 елді мекенді қамтамасыз етеді.
