Орман шаруашылығы және жануарлар дүниесі комитеті елімізде күзгі-қысқы аңшылық маусымының басталғанын хабарлады.
Енді ақпан айының он бесіне дейін сүтқоректілердің 34, ал құстың 59 түрін атуға және аулауға және оның ішінде 1 қарашадан бастап қырғауыл атуға рұқсат етіледі. Рас, аңшылыққа кейбір талаптар күшейген. Мәселен, заң бұзғандарға салынатын айыппұл мөлшері артқан. Мысалы, елікті заңсыз атқандар 25 айлық есептік көрсеткіш (86250 теңге) көлемінде айыппұл төлейді.
Жалпы қыркүйек айынан бастап марал, аю, сібір тау ешкісі, елік, қабан, шіл, қарабауыр және жабайы құстарды, оның ішінде қаз бен үйректі аулауға рұқсат етілді. Жабайы аң мен құсты аулау арнайы бекітілген аңшылық шаруашылықтарында өтеді.
Валерий Щель,
Алматы облыстық аумақтық орман шаруашылығы және жануарлар әлемі инспекциясының бас маманы
