Қазақстанның тұңғыш президенті Нұрсұлтан Назарбаевтың інісі Болат Назарбаев өмірден озды.
Қаралы хабарды растаған Алматыдағы Президент Іс Басқармасы Орталық клиникалық ауруханасының хабарлауынша, Болат Назарбаев 13 қараша күні таңертең дүние салды.
Сондай-ақ ақпаратты тұңғыш президенттің баспасөз хатшысы Айдос Үкібай Twitter-дегі парақшасында растады.
«71 жасқа қараған шағында созылмалы аурудың салдарынан ҚР Тұңғыш Президенті Нұрсұлтан Назарбаевтың туған інісі Болат Әбішұлы Назарбаев дүниеден озды»,- деп жазды ол.
Болат Назарбаев 1953 жылы 23 наурызда туған.
1973-1988 жылдары «Шамалған» кеңшарында механик, аға механик, бригадир, директордың орынбасары болған. 1988-1989 жылдары – Қаскелең қаласы нан зауыты директорының орынбасары.
1989 жылдан 1992 жылға дейін кәсіпкерлікпен айналысқан. «Инкар Агро» ЖШС-ның вице-президенті, BN Invest холдингінің директоры қызметін атқарды. Сонымен қатар, «Салиқалы ұрпақ» қайырымдылық ұйымын құрды.
Бұған дейін Болат Назарбаевтың ауруханаға түскені және оның жағдайы ауыр әрі тұрақсыз екені айтылған болатын.