Бұл туралы “Қонаев Су Арнасы” мекемесінің басшылығы мәлімдеді, деп хабарлайды Қонаев қаласы әкімдігінің баспасөз қызметі.
Жалпы қалада 2082 су және 2559 кәріз құдығы бар. Биыл құдық қақпақтарының жоқтығына шағымданып 22 тұрғын хабарласқан. Ал жоспарлы аралау кезінде тағы 17 құдықтың қақпағы жоқ екені анықталды. Коммуналдық мекеме қызметкерлері бұл олқылықтардың орнын толтырды.
Мекеме басшысы Мади Темиралиевтің айтуынша, қалада құдық қақпақтары жиі ұрланады. Алайда, бүгінге дейін ешкім ұсталып, әкімшілік жазаға тартылмаған.
“Біздің мамандар халық шағымы бойынша барған кезде құдықтардың беті ашық жатады. Сондықтан олар мемлекет мүлкіне кім зиян келтіргенін анықтай алмайды. Темір-терсектерді өткізіп, ақша жасайтындар көбейген. Олар өздерінің зымиян әрекеттерін түнде іске асырады”, – деді ол.
Сонымен қатар Мәди Темиралиев биыл тек қақпақтардың орнына жаңасын қойып, жөндеуге 866 мың теңге қаржы жұмсалғанын айтты.
“Адамдар құдыққа құлап, мертігіп қалуы мүмкін. Егер тұрғындар ашық жатқан құдықты көрсе, бірден хабарлассын”, – деді Мади Темиралиев.
Тұрғындар қақпағы жоқ құдықтарды көрсе “Қонаев Су Арнасы” мекемесіне 8 72772 4-15-45 нөміріне хабарласуға болады.
