Бүгін қанатқақты жоба бойынша елімізде аудан әкімдерінің сайлауы өтіп жатыр. Саяси науқан Қазақстандағы 45 ауданда жүруде. Пилоттық жобаны іске асыруға Алматы облысында екі аудан – Жамбыл мен Балқаш аудандары таңдалғаны белгілі.
Әкім сайлауы өткізіліп жатқан сол 45 ауданның, нақтылай кетсек 42 аудан мен 3 қаланың ішінде сайлаушы саны ең көбі жағынан – Жамбыл ауданы көш бастап тұр. Мұны бізге Жамбыл аудандық сайлау комиссиясының төрағасы Жақсылық Қарымбаев айтты. Аталған аудан бойынша мұнда сайлауда дауыс беру құқығы бар азаматтардың саны – 105 895. Осынша адамның өз сайлау құқықтарын жүзеге асыруы үшін бүгін аудан аумағында 77 сайлау комиссиясы келушілерді қабылдап жатыр. Ондағы сайлау комиссияларының мүшелерінің саны – 534 адам. Таңғы сағат 7-де басталған дауыс беру үрдісінде іркіліс жоқ. Аудандық сайлау комиссиясы төрағасының айтуынша, халықтың белсенділігі жоғары. Мәселен, күндізгі сағат 10.00-ге дейін сайлаушылардың 11,7 пайызы өздері тіркелген сайлау учаскелеріне келіп, таңдауларын жасаған. Бұл аралықта сайлау учаскелерінде ешқандай тәртіп бұзушылық, заңсыздықтар болған жоқ дейді Жақсылық Сұлтанұлы. Сағат 16.00-де Жамбыл ауданында сайлаушылардың 48 пайызы дауыс беріп үлгерді.
Серік САТЫБАЛДИЕВ
Жамбыл ауданы
