Аталған дертті жұқтырған аймақ тұрғындарының 87 пайызы бұрын қызылшаға қарсы екпе алмағандар. Бұл туралы өңірлік коммуникация қызметі алаңында санитарлық-эпидемиологиялық бақылау департаменті басшысының орынбасары Саулет Капсаламова баяндады.
Спикердің айтуынша, Қарасай, Еңбекшіқазақ, Талғар, Іле аудандарында қызылша жұқтырғандар көрсеткіші жоғары. 14 наурыздан 27 желтоқсанға дейінгі аралықта 4 212 адам вирус жұқтырған. Оның ішінде 1850-і 14 жасқа дейінгі балалар, 1611-і 5 жасқа дейінгі балалар.
“Ауа-тамшылы жолмен тарайтын жұқпалы вирустан сақтанудың ең тиімді жолы – екпе алу. Өңірімізде егу шаралары қараша айының 21-нен қазіргі күнге дейін жалғасып келеді. Қазіргі таңда екпе арқылы иммунитетін күшейткендер саны 64 527-ге жетті,” – дейді Сәулет Қапсаламова.
Бұған дейін Денсаулық сақтау министрлігі Астана қаласы мен Шығыс Қазақстан облысында қызылша індетінен екі бала көз жұмғанын хабарлаған. Денсаулық сақтау министрінің орынбасары – Бас санитар дәрігер Айжан Есмағамбетованың айтуынша, қызылшадан көз жұмған балалар – бір жасқа толмаған және қызылшаға қарсы екпе алу жасына жетпеген.
