Алматы облыстық Полиция департаментінің бастығы Бауыржан Әленов «AMANAT» партиясы Алматы облыстық филиалының қоғамдық қабылдау бөлмесінде азаматтармен кездесті.
Қоғамдық қабылдауға Полиция департаментіне қарасты бірқатар салалық бөлім мамандары қатысты. Олардың ішінде тергеу, криминалдық полиция және әкімшілік полиция басқармаларының басшылары бар.
Өңірдің бас полицейі азаматтың арыз-өтінішін бетпе-бет жүздесе отырып тыңдаса, тікелей эфир арқылы онлайн режимде қойылған сұрақтарға да нақты жауап беріп, ұсыныс-пікірлерді назарға алды.
Мәселен, Қонаев қаласының тұрғыны Лилия Андреева алаяқтық фактісі бойынша көмек сұрап жүгінді. Оның айтуынша, мүмкіндігі шектеулі немересін бірге жүрген жігіті алдап, қыздың атынан үлкен сомада несие алып, артынша із-түссіз жоқ болып кеткен.
Мұнан бөлек өзге де шағымдарға түсіндірмелер, кеңестер беріліп, айтылған күрделі мәселелер бас полицейдің бақылауына алынды.
Атап кету керек, партия филиалы келіп түскен арыз-өтініштер оңтайлы шешілгенге дейін полиция департаментімен бірлесіп, тиісті шараларды қабылдап отырады.
