Парламент депутаттары заңға “желілік басылым” мен “ақпарат агенттігі” ұғымдарына “интернет басылым” деп ортақ бір атау беруді көздейтін түзетулер енгізуді ұсынып, ол Мәдениет және ақпарат министрлігі тарапынан қолдау тапты деп хабарлайды ҚазТАГ.
Мәдениет және ақпарат министрлігінің мәліметінше, ақпарат агенттіктері мен желілік басылымдарды интернет басылым деп атау олардың қызметіне кедергі келтірмейді және ақпарат саласының дамуын тежемейді, тек жұмыс істеп тұрған БАҚ-ты заңды тұрғыдан жүйелеуге бағытталған.
Уәкілетті органның мәліметінше, қазіргі уақытта интернет БАҚ пен басқа барлық интернет ресурстарының ара жігін ажырату қиын.
“Бұдан өзге, қазір тек ақпарат агенттіктері ғана тіркелуге міндеттелген. Ал желілік басылымдар тіркеуге тұру процедураларынан өткен интернет ресурс деп аталатынына қарамастан, ерікті түрде тіркеуге тұруға хақы бар. Желілік басылымдар мен ақпарат агенттіктеріне “интернет басылым” деген ортақ мәртебе беру ұсынылып отыр. Бұл БАҚ-тың бір түрі болады”, – делінген министрлік ақпаратында.
Ақпарат агенттіктері мен желілік басылымдар тіркеуге алынғанда интернет басылым деген заңды мәртебе ғана беріледі.
Министрлік дерегінше, барлық ақпарат агенттіктері мен желілік басылымдар еш өзгеріссіз қалыпты режимде жұмыс істей береді. Осылайша, талқылаудағы “Масс-медиа туралы” заң жобасы бойынша БАҚ түрлеріне телеарна, радио, мерзімді баспасөз бен интернет басылымдар жатады.
Қазіргі қолданыстағы заң бойынша, бұқаралық ақпарат құралдары деп уәкілетті органдар тіркелген мерзімді баспасөз, телеарна, радио арна, ақпарат агенттігі мен желілік басылым танылады.
