Алматыда 23 қаңтарға қараған түні болған жер сілкінісінен кейін басы жарақаттанған, соғылған, аяқ-қолы тартылған және басқа да жеңіл және орташа ауыр түрлі жарақат алған 44 адам дәрігерлер көмегіне жүгінді.
Денсаулық сақтау министрлігінің дерегінше, олар қала стационарларына жеткізілді. 44 адамның 34-і ересек, 10-ы бала. 3 ересек ауруханаға жатқызылып, 31 адам амбулаторияда ем алуға жіберілді. 10 балаға дәрігерлер қарап, 5-уі амбулаторияда емдеуге жіберілді.
23 қаңтар күні сағат 00:09 минутта Алматы қаласында жер қозғалды. Жер сілкінісінің ошағы Алматыдан 200 шақырым қашықта Қытай мен Қырғызстан аумағында болды, магнитудасы – 6,7.
ҚР ТЖМ «Сейсмологиялық байқау және зерттеулер ұлттық ғылыми орталығы» ЖШС сейсмикалық станциялар желісінің хабарлауынша, жер сілкінісінің эпицентрі – Алматы қаласынан оңтүстік-шығысқа қарай 264 км жерде орналасқан Қазақстан мен Қырғызстан шекарасы.
