Алматы облысының әкімі Марат Сұлтанғазиев жер сілкінісіне байланысты жедел штабтың шұғыл жиынын өткізді. Жиында тұрғындардың қауіпсіздігін қамтамасыз ету шаралары, апаттан құтқару қызметтерінің жұмысы және қажет болған жағдайда азаматтарды жылы орынмен қамту шараларын ұйымдастыру жайы талқыланды.
Өңірдегі барлық құзырлы мекемелер, полиция департаменті мен жедел медициналық жәрдем қызметі қалыпты жағдайда жұмыс істеп тұр.
Қандай да бір сұрақтар туындаған жағдайда мына телефон нөмірлеріне хабарласуға болады:
– Полиция: 102
– Жедел медициналық жәрдем: 103
– Газ қызметі: 104
– Электр энергиясын тарату қызметі: 105
Облыс тұрғындарына қажет болған жағдайда әлеуметтік мекемелерде уақытша жылыну орындары ашылғанын еске саламыз. Қарасай ауданындағы “Асыл Арман” ықшамауданында 52, Талғар ауданында 51 жылыну орны ашылды.
Сонымен қатар, Қарасай, Іле, Жамбыл, Талғар, Еңбекшіқазақ аудандары мен Қонаев қаласында мешіттерді ашып қою тапсырылды. Қазіргі уақытта Қонаев қаласындағы орталық Қапшағай мешітіне 30 шақты адам келді. Облыстың бас имамы аудандық мешіттермен байланыста, қажет болған жағдайда тиісті көмек көрсетіледі.
23 қаңтар күні сағат 00:09 минутта Алматы қаласында жер сілкінісі сезілді. Жер сілкінісінің ошағы Алматыдан 200 шақырым қашықта болды, магнитудасы – 6,7.
ҚР ТЖМ «Сейсмологиялық байқау және зерттеулер ұлттық ғылыми орталығы» ЖШС сейсмикалық станциялар желісінің хабарлауынша, жер сілкінісінің эпицентрі – Алматы қаласынан оңтүстік-шығысқа қарай 264 км жерде орналасқан Қазақстан мен Қырғызстан шекарасы.
Жер сілкінісінің энергетикалық класы – 15.1.
MPV магнитудасы – 6.7.
Эпицентрдің координаттары 41.22° С. Е. 1.78° с.Б.
Тереңдігі – 65 км.
Алматыда жер сілкінісі 4 балл деңгейінде сезілді.
Google платформасы жер сілкінісі басталардан бірнеше секунд бұрын 6.2 шамасында әлсіз соққылар күтілетінін ескерткен.
Жер сілкінісін Өскемен, Шымкент тұрғындары да сезген.
