Алматы облысында балабақшаларға арналған пилоттық жобасы іске қосылады. Жоба Іле және Еңбекшіқазақ аудандарында бастау алады деп хабарлады Өңірлік коммуникациялар қызметі.
Алматы облысында халық саны көп болғандықтан мектеп жасына дейінгі бала саны да басым. Бүгінде аймақта 1150 мектепке дейінгі ұйым жұмыс істейді. Оның 84,4 пайызы жекеменшік балабақша. Жалпы, 2-6 жас аралығындағы балаларды мектепке дейінгі тәрбиемен және оқытумен қамту көрсеткіші 93,7 пайызды құрайды. Мектепке дейінгі білім мекемелерінде орын тапшы болғандықтан әлі күнге дейін балабақшада кезекте тұрған бүлдіршіндер жетерлік. Кез келген саланы дамытудың басты факторы — қаржы. Сол себепті, бюджет қаржысын оңтайлы пайдалану үшін арнайы тетік ойластырылуда.
Жауапты мамандар балабақшадағы барлық жұмысты бақылаудың басты жолы интеллектуалды биометриялық сәйкестендіру деп аталатын жоба екенін айтады. Аталмыш жоба балалардың жеке меншік балабақшаларға баруын есепке алуға мүмкіндік береді. Нәтижесінде, мектепке дейінгі ұйымдарда жан басына шаққандағы қаржыландыруға жергілікті бюджеттен бөлінген қаражаттың мақсатты жұмсалған,я жұмсалмағанын анықтауға болады.
Президент Қасым-Жомарт Тоқаев «Әділ Қазақстанның экономикалық бағыты» атты Қазақстан халқына Жолдауында сапалы жаңа мемлекеттік сатып алу жүйесін енгізу бойынша тапсырма берген. Осыған байланысты, Цифрлық технологиялар басқармасы білім беру саласында аталған мәселелерді шешуге арналған жан-жақты қарастырылған жоба әзірледі. “Жобаның артықшылығына тоқталатын болсақ, біріншіден, ел арасында жоғары сенімділік туғызады. Екіншіден, интеграцияның ыңғайлылығы мен бюджет шығындарын оңтайландыруға септігін тигізеді. Жүйе пилоттық режимде Іле және Еңбекшіқазақ аудандарында іске асырылады деп жоспарланған”,- деді Цифрлық технологиялар басқармасының басшысы Жандос Сәбит.
Еске салайық, жүйе облыс әкімінің тапсырмасы бойынша қолданысқа өтеді. Мамандар пилоттық жобаны үш ай көлемінде бақылауға алатынын жеткізді. Оң нәтиже берсе, облыс көлемінде іске қосылады.
