Республика бойынша бір айдың ішінде 15 кәмелет жасына толмаған бала немесе жасөспірім жол апатынан мерт болды.
«15 ақпаннан бастап ел аумағында «Қауіпсіз жол» профилактикалық іс-шарасы өтіп жатыр. Оның аясында балалардың жолдағы қауіпсіздігін қамтамасыз етуге бағытталған «Сіздің жолаушы – балаңыз!» атты акция да бар. Республика бойынша бір айдың ішінде 15 кәмелет жасына толмаған бала немесе жасөспірім жол апатынан мерт болды. Олардың 12-сі жолаушы және ата-ананың немқұрайлылығынан мерт болды», – деді Ішкі істер министрлігі Әкімшілік полиция комитетінің ерекше тапсырмалар жөніндегі аға инспекторы Ақтоты Боранова ведомствода өткен брифингіде.
Осы орайда Ішкі істер министрлігінің өкілі жолаушыларды жол ережесі мен қауіпсіздігін қатаң сақтауға шақырды.
«Барлық талап пен ережені қатаң сақтау қажеттігіне назар аударғым келеді, әсіресе қолайсыз ауа райы кезінде. Жол ережелерін сақтасақ, өзіміз бен жақындарымыз қауіп-қатерге ұшырамайды», – дейді ол.
