Алматы облысында «Ауыл аманаты» жобасы аясында 720-дан астам адамға шағын несие берілді. Бұл жөнінде Өңірлік коммуникациялар қызметінің ақпараттық алаңында “Қонаев” әлеуметтік-кәсіпкерлік корпорациясы акционерлік қоғамының мемлекеттік бағдарламаларды іске асыру департаментінің директоры Диас Шаяхметов баяндады.
Елді мекендерде тұратын ағайын үшін жағымды жаңалыққа айналған бағдарламаның басты мақсаты – халықты тұрақты жұмыспен қамту мен ауыл тұрғындарының әлеуетін көтеру.
Былтыр мамыр айынан бастап Алматы облысының кәсіпкерлерін “Ауыл аманаты” бағдарламасы бойынша қаржыландыру басталды. Мәселен, былтыр мамыр мен биылғы жылдың ақпан аралығында “Қонаев” Әлеуметтік-кәсіпкерлік корпорациясы” АҚ-ға 10,6 млрд теңге сомасына 1450 өтінім келіп түсті. Оның ішінде 1 045,6 млн теңге сомасына ауылдық кәсіпкерлік кооперативтерден 41 өтінім келіп түскен. Облыс аудандары арасында өтінімдер саны бойынша Еңбекшіқазақ, Кеген, Ұйғыр аудандарының кәсіпкерлері көш бастап тұр.
«Жоба аясында ауылшаруашылығы, мал және құс шаруашылығына басымдық береміз. Сауда-саттық жүргізу үшін несие берілмейді. Бағдарлама арқылы несиелеуге қатысу үшін кепіл, бизнес жоспар және ауылдық жерде тұрғылықты тіркеуде болу керек», – деді Диас Шаяхметов.
Спикердің айтуынша, қаржы кооперативтер мен мал шаруашылығына 84 айға дейін берілсе,айналым қаражатын толықтыруға 36 айға дейін қарастылған.
Қазіргі таңда “Қонаев “ӘКК” АҚ жеңілдікпен кредиттеуге түскен өтінімдердің ішінен жалпы сомасы 8 174,1 млн теңгеге 1129 өтінім мақұлданды. Оның ішінде 720 қарыз алушыға жалпы сомасы 5,4 млрд теңге қарыз берілді.
Сондай-ақ, брифингте Диас Шаяхметов несиенің ең жоғары несие сомасы 2,5 мың АЕК немесе 8,6 млн теңге екенін айтты.
